LUCKY CAIN
KWAVALEKA umnyango kwavuleka omunye kumlingisi osezakhele igama emidlalweni kamabonakude, uTyson Mathonsi (osesithombeni) waseJ2, eSikhaleni, eMpangeni, owalimala kanzima, kwashabalala iphupho lokuba ngumdlali wombhoxo odumile, kwavuka elokulingisa.
UTyson – owaziwa ngokudlala indawo kaJabu emdlalweni owuchungechunge iSibongile and The Dlaminis – usezobonakala emdlalweni othi “Umjolo: The Gone Girl”, ozokhonjiswa esiteshini se-internet, iNetflix, kusukela namuhla ngoLwesihlanu. Uthe uzobe edlala indawo kaLucky, ongowesilisa onothando kodwa obhekene nezingqinamba zomjolo.
Uveze ukuthi kumkhulisile ukulingisa kwiSibongile And The Dlaminis.
Uthe walimala esefunda amabanga aphakeme eSt Charles College, eMgungundlovu – lapho ayefunda khona ngomfundaze wombhoxo. “Ngenhlanhla kangixoshwanga esikoleni ngenxa yokuthi ngangikhaliphile, umfundaze wami waqhubeka ngaze ngaphothula u-matric,” esho.
Uthe ngemuva kwalokho, wenza izifundo zokulingisa e-AACA, eGoli. “Izinto zami zingihambela manje kahle njengoba ngibuye ngibe ngumculi ngaphansi kweqembu iThe Incredibles,” kusho yena. Leli qembu likhiphe ingoma ethi, “Sesfikile”, namhlanje ngoLwesihlanu.
