UKHOMBE ukunganakwa ngendlela kwengqalasizinda yomasipala, njengenye yezimbangela yokushoda kwamanzi kuleli, uMnu Paul Mashatile (osesithombeni), oyiSekela likaMengameli.
UMashatile ubephendula imibuzo yephalamende ekupheleni kwesonto eledlule, lapho eveze khona ukuthi abakutholile wukuthi ukunganakekelwa ngendlela kwengqalasizinda ezingeni lomasipala, kunomthelela omkhulu ekushodeni kwamanzi kuleli.
“Inkinga enkulu esiyaye siyithole ngokushoda kwamanzi ezweni lonke, wukuthi ingqalasizinda kayinakekelwe ngendlela ezingeni lomasipala. Okungaba wubudala bayo (ingqalasizinda) noma wukuvuza kwamapayipi, okuholela ekutheni amanzi angafiki ezakhamizini ngendlela efanele,” esho.
Uthi isisombululo salokhu, wukuthi uhulumeni omkhulu ufake isandla lapho omasipala behluleka khona.
“Njengamanje silungiselela ukuthuthu-kisa ingqalasizinda, siqinisekise ukuthi sibhekana nazo zonke izingqinamba ezibhekene nomasipala, ezithinta amanzi. Uma ubhekisisa kahle, uyabona ukuthi abanye omasipala kabatshalile (invest) kwingqalasizinda yamanzi. Ukuqinisekisa ukuthi lokhu kuyenzeka, sizoba nethimba elihlanganise onjiniyela nochwepheshe, abazoqinisekisa ukuthi omasipala sibahlinzeka ngosizo olufanele ekuthuthukisweni kokulethwa kwamanzi,” esho.
Uthi phezu kweminye imizamo abanayo, wukuthi bonke omasipala babe namaloli abo, athutha manzi ukuze kuvimbeke osomabhizinisi abafuna ngodli, amathenda okuha-mbisa amanzi emiphakathini. Ngesikhathi uRamaphosa ethula inkulumo yakhe ebheke esizweni, waveza ukuthi usesungule ikomidi elizobhekana nenkinga yamanzi.
Wathi leli thimba lizosebenzisana nohulumeni kazwelonke kuya kohulumeni basekhaya, ukuqinisekisa ukuthi izinkinga zamanzi ziyaxazululeka. Maduze uhulumeni wathi uzobe usukuphothulile ukwakhiwa kohlaka iNational Water and Resource Infrastructure Agency, oluzobhekana ngqo nokulungiswa kwengqalasizinda yamanzi.
