INKANTOLO yeSifunda yaseThekwini ichithe ukuthi kulalelwe ubufakazi beMeya yasoThukela, iNkosi uNtandoyekosi Shabalala eveze ukuthi izoyamukela emsebenzini imenenja yakulo mkhandlu uMnu Lanhelihle Jili (46) uma idedelwa ngebheyili ecaleni lenkohlakalo nelokuzama ukugwazela amaphoyisa ethweswe wona.
Imeya ibiveze ukuthi ingangena ngisho ebhokisini izofakaza ngoba uJili wenza umsebenzi omuhle kumasipala uThukela.
IMantshi uMnu Garth Davis ithe ayisiboni isidingo sokungenelela komkhandlu kuleli cala ngoba uJili uboshelwe amacala obugebengu.Â
Umshushisi u-Adv Joel Kiston ukuhlabe wakuhlikiza ukuthi uJili noDlamini badedelwe ngebheyili. Ukhale ngokuphepha kofakazi kuleli cala.
“Ukudedelwa kwabo ngebheyili akuqinisekisi ukuphepha kofakazi noma ngabe babekelwe miphi imibandela. Sekukaningi kubulawa ofakazi. Sinamacala esingawabala lapho kwakubulawa khona ofakazi. Kukhona nje owabulawa esenkantolo okukhomba ukuthi abaphephile kangakanani. Okunye okuvelayo ukuthi ofakazi bayasatshiswa kuleli cala okusho khona ukuthi impilo yabo isengcupheni,” esho.
Ummeli kaJili noDlamini, u-Adv Paul Jorgensen, uthe yize uMbuso uveza lezi zinsolo kodwa akukho okuhlanganisa abamangalelwa nazo.
“Amaphoyisa azivezile izinsolo zokusatshiswa kofakazi kodwa akukho lapho eveze khona ukuthi ziyamaniswa nabamangalelwa. Kumanje abukho ubufakazi noma isiqiniseko sokuthi uma bededelwa ngebheyili bazophazamisa ofakazi,” esho.
Uphinde wacela ukuthi uma inkantolo ibanika abamangalelwa ibheyili ucela ukuthi uDlamini abhekelelwe ngokudedelwa ngemali encane. Uphinde wabancengela ngokuthi abakaze bagwetshwe ngaphambilini.
Imantshi ize yenza ihlaya ngokuthi uDlamini anikwe ibheyili yemali encane, ekubeni kuthiwa wafika ephethe u-R600 000 ongukheshi.
Emva kwalezi zethulo imantshi ithe izokhipha isinqumo ngoLwesibili.
tndlovu@ilanganews.co.za
