ISUSE ukukhuluma ezinkundleni zokuxhumana enye yezinduna zezinsizwa kwaMandlakazi, kwaNongoma, uMnu Nkosikhona Ndabandaba, odume ngelikaPhakel’umthakathi.
UPhakel’umthakathi onabalandeli abaningi ku-facebook, usole uDkt. Zweli Mkhize, ngokugaqela isikhundla eNdlunkulu kaZulu. Usho lokhu kulandela ukubakhona kukaDkt. Mkhize emcimbini woMkhosi woSelwa obubanjelwe esigodlweni saseMashobeni, kwaNongoma, ngoLwesithathu.
Kwi-video ayifakile kule nkundla, kubonakala uDkt. Mkhize eme phakathi kweNkosi yesizwe sakwaButhelezi, uZuzifa noMntwana uVanana.
Kuzokhumbuleka futhi ukuthi uDkt. Mkhize kakujwayelekile ukuthi kube nomcimbi waseNdlunkulu osuke uhanjelwe yisizwe angabikhona.
Uphinde aziwe nangokuhambela imicimbi eyahlukene esuke yenziwe amakhosi ezizweni zawo.
UPhakel’umthakathi uthe:
“Tshelani uBaba Zweli Mkhize ukuthi akayeke ukugaqela izikhundla zaseNdlunkulu ngoba asikho ayoke asithole uyoze ahambe emhlabeni. Izinto zinabanikazi bazo,”kusho yena.
Lokhu kakwehlanga kahle kwabanye babalandeli bakhe njengoba bethe uDkt.
Mkhize ujwayele ukuba yingxenye yemikhosi yaseNdlunkulu nemicimbi yakhona ehlukene kakukho okuhlukile ngokubonakala kwakhe kulo mcimbi.
Omunye wabalandeli bakhe uze waveza ukuthi uDkt. Mkhize uyilungu lekomiti elibhekelele ukusebenza koMnyango wezokuBusa ngokuBambisana nezoMdabu ngakho-ke kakukho okungajwayelekile ngokuba yingxenye kwakhe kulo mcimbi.
