UKHOMISHANA wamaPhoyisa kuzwelonke uGeneral Fannie Masemola, usemise emsebenzini iPhini lakhe uLt-General Shadrack Sibiya (osesithombeni) ophikweni lwabaphenyi.
Ngokubika kwe-EWN, uSibiya ukuqinisekisile ukumiswa kwakhe ngeSonto lapho eveze ukuthi uthole incwadi eqhamuka kuMasemola ngoLwesihlanu. Ukumiswa kukaSibiya kuyanyaniswa nokuthinteka kwakhe ezinsolweni zokugxambukela ekusebenzeni kophiko lwamaphoyisa aKwaZulu-Natal, obeluphenya ngokubulala okuhlobene nepolitiki, nokuzama ukuluhlakaza lolu phiko.
Kuzokhumbuleka ukuthi ukuthinteka kwegama likaSibiya kulokhu, kwavezwa nguKhomishana wamaPhoyisa KwaZulu-Natal, uLt-Gen Nhlanhla Mkhwanazi, ngesikhathi enesithangami nabezindaba ngoNtulikazi (July). UMkhwanazi waveza amahlazo ngokugxambukela kwabepolitiki emsebenzini wamaphoyisa, ukuphazamisa umsebenzi wawo.
Phambilini uMasemola wakhetha ukumyisa ekhefini eliyisipesheli uSibiya, ngemuva kokuvela kwalezi zinsolo. Ngeledlule uSibiya ukhale ngaphansi eNkantolo eNkulu yaseGauteng, ngemuva kokufaka enkantolo, efuna kuchithwe eyokuyiswa kwakhe ekhefini eliyisipesheli.
Kule nkantolo ijaji lithole ukuthi ukuyiswa kwakhe kuleli khefu, kwakuphambene nomthetho. Ngokubika kwe-EWN, ukumiswa kukaSibiya kuzoqhubeka kuze kuphele uphenyo lweKhomishana kaMadlanga, ezogxila ekugxambukeleni kwezepolitiki emsebenzini wamaphoyisa.
Phambilini uSibiya wazibophezela ukuvela phambi kwale khomishana, aveze uhlangothi lwakhe ngalezi zinsolo.
lucky.cain@ilanganews.co.za
