UMASIPALA weTheku wethule umkhankaso wokukhuthaza abantu abathungatha umsebenzi, abaphila nokukhubazeka, ukushesha baphumele obala ngesimo sabo, bangalindi kuze kufike isikhathi senhlolokhono.
Lo mkhankaso uqhamuka ngesikhathi lapho iNingizimu Afrika igubha inyanga kaLwezi (November), ethathwa njengeyokuqwashisa ngamalungelo abantu abaphila nokukhubazeka. Lo masipala uthi uzimisele ukuphuma inqina, ukhuthaze abaphila nokukhubazeka ukungazenyezi, futhi bangafihli uma kukhona ukukhubazeka abaphila nakho.
UMnu Sihle Mkhize, onguMqondisi ehhovisi lakwandabazabantu kuMasipala weTheku, uthe bathola izinkulungwane zezicelo zomsebenzi eziqhamuka kubantu abaphila nokukhubazeka, kodwa ezisuke zingagcwaliswanga esikhaleni sokudalula ukukhubazeka kwabo.
“Esikhathini esiningi, sivamise ukuthola ukuthi umuntu uphila nokukhubazeka uma esebizelwe inhlolokhono, okanye eseqashiwe, okwenza kube nzima ukumhlelela ngendlela efanele uhlelo lokusebenza oluhambisana nokukhubazeka kwakhe, futhi athole nokwesekwa okufanele,” esho.
Uthe uma njengabaqashi bazi ukuthi isisebenzi esithile sinakuphi ukukhubazeka, kuba lula kubona ukulandela imigudu efanele, ehambi-sana nomthetho wezisebenzi ovikela abakhubazekile.
“Siyakwazi ukubahlelela indawo yokusebenza elungele ukuthi bakwazi ukungena nokuphuma, ngaphandle kokuzizwa becindezelekile, noma becwaseka. Sisuke sifuna ukuba bazizwe behloniphekile futhi benesithunzi njengezisebenzi ezisemthethweni,” esho.
Uthe umasipala uzimisele ukuwuqinisa lo mkhankaso, futhi ufundise nomphakathi ngezindlela zokuphilisana nabantu abaphila nokukhubazeka. Ukhuthaze abaphila nokukhubazeka ukuba baqhubeke nokufaka izicelo zomsebenzi kulo masipala futhi basebenzise ukukhubazeka kwabo ngendlela engakhombisi ukuthi bafuna ukuzwelwa, njengoba bengaba-mba iqhaza elimqoka emsebenzini.
