SISHUBILE isimo emtholampilo waseVryheid, kulandela isigameko esenzeke ngoLwesibili, omunye wabaphathi, ongowesifazane, ekhumulisa izisebenzi zesifazane zasala nqunu, ezisola ngokweba u-R200 wakhe.
Kubikwa ukuthi lokhu kudunge isimo kulo mtholampilo njengoba sekukhona abafuna amiswe lo mphathi (ILANGA elinalo igama lakhe kodwa eligodliwe) kulandela isenzo sakhe, ezisebenzini ezingamaCommunity Health Care Workers. Kuthiwa lesi sigameko senzeke kubuka amalungu omphakathi abekhona emtholampilo, okwehlise isithunzi salezi zisebenzi okuthiwa beziseshwa ngonogada zinqunu, kubhekwa imali okuthiwa ilahlekile.
NgoLwesine inyunyana iNational Public Service Workers Union (NPSWU) ibihambele lo mtholampilo ngenhloso yokuhambisa izikhalo kubaphathi bawo. Ikubeke kwacaca ukuthi lo mphathi ifuna amiswe emsebenzini uma sekuqhubeka uphenyo ngalesi sigameko.
Ngelanga lesigameko, kubikwa ukuthi lesi sikhulu sabika ukuthi silahlekelwe yimali yaso ewu-R200, eyayisehhovisi laso. Kuthiwa sibe sesisola izisebenzi ezinhlanu ukuthi ziyathinteka kulokhu, sabe sesizibiza sazibuza, okuthe uma ziyilandula imali, sabiza onogada ukuba baziseshe. Kuthe uma bengayitholi imali, sayalela izisebenzi ukuba zikhumule zisale nqunu ukuze zizoseshwa kahle ukuthi kaziyifihlile yini ezithweni zangasese.
Lokhu kuthiwa kubonwe nangabanye abantu abebekhona emtholampilo, kuthiwa indawo abebeseshelwa kuyona ivulekile, okwenza kube lula ukuthi umuntu oseduzane abone ukuthi kwenzekani ngaphakathi. Kuthiwa kuze kwangenelela amalungu omphakathi abesemtholampilo ngoba engahambisani nalokhu abekubona kwenzeka.
UMnu Bhekizenzo Zulu weNPSWU, obezifikele mathupha kulo mtholampilo uthe: “Sifuna ukuthi lesi sikhulu simi-swe emsebenzini kube kuqhubeka upheyo. Onogada abathintekayo nabo sithi mabathathelwe izinyathelo ngoba lokhu abakwenzile kuphambene nomthetho. Sifuna izisebenzi ezithintekayo zithole usizo lokwelulekwa ngokwengqondo ngoba zehlewe isithunzi ngokukhunyulwa zisale nqunu kubuka abantu.”
Okhulumela uMnyango wezeMpilo KwaZulu-Natal, uMnu Ntokozo Maphisa, uthe lolu daba selufikile kubona. Uthi kuyalelwe ihhovisi lesifunda ukuba lululandele. Uthi kabahambisani nokuhlukunyezwa kwezisebenzi.
