UMANGAZE amakholwa umBhishobhi we-Evangelical Lutheran Church in Southern Africa (ELCSA) waKwaZulu-Natal, eduba umnikelo nezipho, “ecasulwa wukungahlonishwa” nezinkinga okuthiwa zikhungethe amaLuthela akulesi sifundazwe, emhlanganweni womama benkonzo obuse-African Enterprise, eMgungundlovu ngempelasonto edlule.
ILANGA lithole ngamalungu aleli bandla ukuthi umBhishobhi Nkosinathi Myaka nenkosikazi yakhe abebekulo mhlangano, balibeke ngembaba elokuthi abazowuthatha umnikelo abebenikwa wona, futhi bayaphoqeleka ukuthi babuyisele emuva nezipho ebezilethwe kubona kuze kube kulungiswa izinkinga ezikhungethe iKZN, banikwe inhlonipho ebafanele.
Leli phephandaba linazo izinkulumo eziqoshiwe okuthiwa bekukhuluma umBhishobhi Myaka nenkosikazi yakhe, ebizwa ngoMaDlamini. Enkulumweni okuthiwa yenziwe ngumBhishobhi Myaka uthe: “Kuyongijabulisa ukuthi lo mhlangano uthathe isinqumo sokuthi uthume ikomidi elizolungisa izinkinga ezikhona. Kusemandleni awo lo mhlangano ukuthi ukwenze lokho. Eqinisweni angijabule neze,”esho.
Enkulumweni ekuthiwa yenziwe yinkosikazi kambhishobhi: ithe “Ngaphezu kwakho konke, sisengamakholwa. Ebandleni sinobuholi. KwiDiocease sinobaba umBhishobhi Myaka oganwe nguMaDlamini. Ezifundeni sinobaba nomama abangabaphathi zifunda.
“Nakwisekhethe sinobaba nomama abangabaphathi sifunda. Ukwehlisana isithunzi kubi. Akukho esikubangayo masingehlisani isithunzi. Kubantu bonke abebelethelwe izipho bezimbozwe kahle kodwa ezethu zilethwe zinqunu. Siphoqeleke ukuba sibuyise emuva konke enisiphe khona,” kusho uMaDlamini.
Ethintwa umBhishobhi Myaka ngalolu daba uthe ucela ukungaphawuli. Umnikelo nezipho kuthiwa bekulethwe yisigungu somama esilawula iKwaZulu-Natal, esiholwa nguDkt Nonhlanhla Mkhize onguSihlalo waso.
UDkt Mkhize kuthiwa unguSihlalo wohlaka lomama kwiPherishi iDurban South, unguSihlalo walo nakwisekethe yaseThekwini, aphinde abe nguSihlalo walo eKZN. Ezintweni ezithinta ibandla usakubeka kwacaca, uDkt Mkhize ukuthi akanalo ilungelo lokuphawula kuzona, noma ngabe kuhle noma kubi, kodwa umuntu ophawulayo ngumBhishobhi Myaka kuphela.
ILANGA lithole ukuthi ngokujwayelekile umBhishobhi Myaka uvamise ukuxhawulwa ngo-R50 000 uma ehambele imi hlangano yebandla aphiwe nezipho. Lokhu kuke kwavela nasembikweni wezimali webandla ka-2025/ 2026, ngesikhathi kunomhlangano womama obuseNorthwood Boys High School, mhla ka-8 kuya ku-12 kuNtulikazi (July) nonyaka.
Emuva “kokuduba” kukambhishbhi umnikelo, kuthiwa isigungu somama sesifundazwe ebesihambise umnikelo, sithukuthele sathelwa ngamanzi, sikhala ngokwehliswa isithunzi. Lokhu kube yizindaba okuthiwa zehle kahle kwamanye amakholwa, ngoba bese kunezinsolo zokuthi umbhishobhi ucheme nalesi sigungu. Kuthiwa akekho obezitshela ukuthi anganqaba umnikelo nezipho eziqhamuka kusona.
