UMPHAKATHI waseMountview eVerulam uzithathele umthetho ngezandla ngokushaya kanzima waze washona owesilisa (24) okuvela ukuthi ugwaze ugogo wakhe emqaleni efuna imali yokuthenga izidakamizwa.
Ngokusho kwankampani yonogada iReaction Unit South Africa (RUSA) babizwe ngeSonto ntambama ngesigameko sowesilisa ogwaze ugogo wakhe emqaleni.
Ngesikhathi befika onogada kabazange besamfica umsolwa njengoba begcine ngokuxilonga ugogo ngaphambi kokuthi aphuthunyiswe esibhedlela.
Kubikwa ukuthi ngoMsombuluko ekuseni umphakathi ugcine ngokuzibambela lo msolwa babe sebembopha izandla nezinyawo.
Kuvela ukuthi umphakathi ube usizithathela umthetho ngezandla ngokutalabha kanzima lo msolwa waze washonela khona endaweni yesigameko.
I-RUSA iveza ukuthi ibizwe ngoMsombuluko ekuseni ngalesi sigameko njengoba betshelwe ukuthi amalungu omphakathi asezibambele ngokwawo umsolwa.
Ngesikhathi onogada bale nkampani befika bese kumenele lo mlisa. Kubikwa ukuthi lo mlisa ubenomlando wokumhlukumeza ugogo wakhe.
