UMQHINGQO wamabutho kaZulu, obuzoba ngaphandle kwamahhovisi eNgonyama Trust eMgungundlovu, ekuseni namhlanje ngoLwesihlanu usuhlehlisiwe.
Amabutho abehlele ukuyofuna incazelo ngokusebenza kwebhodi leNgonyama Trust, njengoba iSilo uMisuzulu kaZwelithi, sathi siyalihlaza, kwaze kwangenelela uNgqonqgqoshe wezoMhlaba kuZwelonke, uMnu Mzwanele Nyontso, wakumisa lokho.
Isitatimende esikhishwe yihhovisi lomdidiyeli wamabutho kaZulu, uMntwana uVanana Zulu, waKwaMinyamanzi, sithi lokhu kudalwe ukuthi isikhulu esiphezulu seNgonyama Trust, uMnu Vela Mngwengwe, siyalele izisebenzi ukuthi zingezi emsebenzini, futhi zivale amahhovisi.
UMntwana uSimphiwe Zulu, okhulumela iNdlunkulu kaZulu, ukuqinisekisile ukuthi ukuqhingqa sekuhlehliselwe usuku oluyobuye lumenyezelwe.
Ihhovisi lomdidiyeli wamabutho lithi iBhodi leNgonyama Trust elihlakazwayo lizibona lilikhulu kuneSilo, ekubeni yisona esinguSihlalo weNgonyama Trust. Lifuna futhi kucaciswe nangezinsolo zokuthi kunomhlaba ongaphansi kweNgonyama Trust, owadayiswa ngo-R22 million.
menzi.jele@ilanganews.co.za
