INTATHELI YELANGA
UNXUSWE ukuhlaba ikhefu ebhodleleni uSipho Mbule ongumdlali omusha we-Orlando Pirates. UMbule uzakhele igama elihlikihla enkabeni yeSuperSport United – esanda kudayiselwa iSiwelele FC – wathengwa yiMamelodi Sundowns. IDowns imebolekise kwiSekhukhune United, egcine imkhombe indlela, esolwa ngokungaziphathi kahle.
USteve “Chippa” Lekoelea owadlala iminyaka kwiPirates – eyayimthathe kwiMoroka Swallows – unxuse uMbule ukuba athi ukunciphisa ngasezinkambeni zikaFaro.
Ngokubika kweKickOff.com, uLekoelela uthe: “IPirates ibambe ufishi omkhulu ngokusayinisa uMbule, usezingeni eliphezulu, kanti-ke manje usedlala ekilabhini enkulu. Kuzomele aziphathe kahle ngaso sonke isikhathi, futhi kuzofanele ame kancane ngendaba yotshwala, abhekane nomsebenzi wakhe webhola.”
ULekoelea uqhube wathi njengoba uMbule engumdlali wekilabhu enkulu, kumele aqhelelane nezinto ezizophazamisa umsebenzi wakhe. “Ngenxa yezinto esesizifundile ngaye (kwabezindaba) kubalulekile ukuba aqhele etshwaleni. Kumele anake umsebenzi wakhe futhi asebenzele ukungena eqenjini lesizwe,” kusho uLekoelea owayephilisa kabi izitobha ngesikhathi esadlala.
Ngaphandle kwemibiko engemihle ngoMbule, lo mdlali unekhono elibabazekayo lokufunda umdlalo, futhi ukhipha amaphasi axoxa indaba. Kanti uyingozi noma ebhekene nepali.
