UZOPHENYA ngembangela yokungalungiswa kwezikole ezikhahlamezwe izinhlekelele eminyakeni edlule kulesi sifundazwe uNdunankulu waKwaZulu-Natal, uMnu Thami Ntuli. Lokhu ukuveze ngoLwesihlanu eyohlola umonakalo eThandukwazi Primary School KwaMashu,  eThekwini naseShayamoya Primary okuyizikole ezingaphansi kwesifunda iPinetown, eThekwini.
Lesi sikole ngesinye sezikole esipheshulwe wumoya obuhlasele esifundazweni kuleli sonto. UNtuli ushaqiswe ngukuthi isikole iThandukwazi Primary sikhahlamezeke ngonyaka ka-2022, asikaze silungiswe njengoba siphinde saphephuka kulo nyaka.
“Ngizophenya ukuthi kungani singalungiswanga isikole. Kuzomele kubekhona abaphendulayo ngalokho ngoba inhlalakahle yabantwana nemfundo yabo kufanele inakekelwe,” kusho uNtuli.
Ziwu-134 izikole ezilinyazwe iziphepho esifundazweni KwaZulu-Natal. Inhloko yoMnyango wezeMfundo KwaZulu-Natal, uMnu Nkosinathi Ngcobo uthe ezinye zezingqinamba ababhekne nazo ukushoda kwezimali emnyangweni wezemfundo.
“Kubi ukufundela kwabantwana endaweni engekho esimweni esihle,” kusho uNgcobo.
