Uphiko loKlebe ngaphansi kweDurban Serious Organised Crime Investigation ngokubambisana namaphoyisa esiteshi saseBhekithemba abophe umsolwa oneminyaka ewu-20 ubudala ngezinzolo zokubamba inkunzi nokubulala uSayitsheni Nkululeko Mbambo (47).
Ngokwesitatimende samaphoyisa ngomhla ka-11 kuDecember uSayitsheni Mbambo osebenzela esiteshini esisechwebeni yaseThekwini, wayezilalele kwakhe esigcemeni sakwaN eMlazi ngesikhathi udadewabo ebona umsolwa egcekeni.
Kubikwa ukuthi udadewabo waphuthuma egumbiini lokulala likaMbambo ukuyomazisa ngomsolwa egcekeni.
UMbambo wavuka eyobheka lo msolwa nokwathi esasephaseki lomuzi wakhe kwazwakala kuqhuma isibhamu amahlandla. Yilapho kwavela ukuthi umsolwa nguyena odubulayo njengoba uMbambo washona ngaleso sikhathi.
Kubikwa ukuthi umsolwa nabanye ayehamba nabo bathatha isibhamu somsebenzi sikaMbambo nezinye izimpahla ezazisendlini okubalwa kuzo i-laptop, amateki, omakhalekhukhwini nokunye.
Kwavulwa icala lokubulala nelokubamba inkunzi emzini esiteshini samaphoyisa eMlazi.
NgeSonto kuboshwe lo msolwa oneminyaka ewu-20 ubudala njengoba kulindeleke ukuba avele enkantolo ngoLwesibili mhla ka-31 kuDecember 2024.
Izikhulu zamaphoyisa zikushayele ihlombe ukuboshwa kwalo msolwa nomsebenzi omuhle owenziwe ngoKlebe ngokubambisana namaphoyisa.
