KUNZIMA kumlingisi weGenerations: The Legacy edlala kwiSABC 1, olaliswe esibhedlela, ngemuva kokulimala kanzima elunywa yizinja ezimbili, ezingamaPitbull zakwamakhelwane walapho eqashe khona, eBoksburg, eGoli.
Ngokuthola kweLANGA ngomthombo walo osondelene noMondli Thusi (osesithombeni), odlala indawo yephoyisa u-Isaac kulo mdlalo, sibi isimo kulo mlingisi. Umthombo uthi ulaliswe esibhedlela iTambo Memorial.
“Ucishe washona uMondli ngendlela alimale ngayo emilenzeni, futhi kakubonakali ukuthi uzophinde akwazi ukuhamba egqoke isikhindi ngokukhululeka. Okuphinde kwafaka usawoti esilondeni, wukuthi uMondli bekumele aqale ukushuthela umdlalo omusha weNetflix, ngoLwesihlanu (kusasa), kodwa akasakwazanga njengoba esalele esibhedlela,” kusho umthombo.
Kuthintwa uMondli, uthe ucele ukungandi ngalolu daba ngoba usezinhlungwini. Uthe uyakuqinisekisa ukuthi ulaliswe esibhedlela ngenxa yokulimala kanzima. Uthe kunzima kakhulu kuyena njengamanje.
ILANGA linayo ikhophi yesitatimende saseBoksburg SPCA, esiveza ukuthi umnikazi wamaPitbull useyihambisile eyodwa kuwona. Esitatimendeni sabakwaSPCA, bathi umnikazi wezinja uyaphika ukuthi ngezakhe izinja ezilume lo mlingisi, kodwa uthi ngezinye ezibukeka njengezakhe.
Bathe noma kunjalo, kodwa bayaqhubeka nokwenza uphenyo njengoba beqoke umphenyi uMnu Ralph Chivaviro, ukuthi aqoqe yonke imininingwane ngalolu daba.
Okhulumela amaphoyisa eGoli, uLT Colonel Mavela Masondo, uthunyelwe umbiko ngalolu daba, njengoba kuvulwe icala esiteshini samaphoyisa iBoksburg North, wawufunda kodwa wangaphendula. Ufoneliwe kodwa ucingo ubengaluphenduli.
