UPHENDULWE ijazi elikade lazigugela u-Elvis Chipezeze ongunozinti weMagesi FC ekorelwa amagoli amathathu yiCarling All Stars XI kuba ngu-3-0 ngoMgqibelo e-Orlando Stadium, eSoweto.
Amagoli e-All Stars ashaywe nguNaledi Hlongwane ngomzuzu ka-11 noka-23. Elinye leza noSamkelo Zwane ngoka-21.
Kuzokhumbuleka ukuthi iMagesi iqophe umlando inqoba isicoco seCarling Knockout ekubeni ingomakoti beligi. Ihlule iMamelodi Sundowns ngo-2-1 kowamanqamu.
UChipezeze ugile izimanga kwiCarling Knockout njengoba eqokwe kuyona yomine imidlalo njengomdlali ovelele.
I-All Stars imuphendule ijazi njengoba imubhudluze ngamagoli amathathu. Lokhu kwenze i-All Stars yayivikela le nkomishi eyinqobe ngesizini edlule eyehlule kuyona iStellenbosch.
