IZOKWENYUSWA ngo-0.5% kulo nyaka intela ekhokhwa ngabathengi ezimpahleni ezinhlobonhlobo, nakumasevisi athile, ebizwa nge-Value Added Tax (VAT).
Nangonyaka ozayo izophinda yenyuswe ngomunye u-0.5%, okuzoyenza igcine yenyuke ngo-1% eminyakeni emibili kusuka manje. Lokhu kuchaza ukuthi kule minyaka emibili intela izokwenyuka isuke ku-15% ekuwo njengamanje, ifinyelele ku-16%.
Lolu guquko kwiVAT lumenyezelwe nguNgqongqoshe wezeMali uMnu Enoch Godongwana ngoLwesithathu ntambama, ngesikhathi ethula isabelomali salo nyaka, ePhalamende likazwelonke eCape Town.
Lesi sabelomali kwakufanele sethulwe ngenyanga edlule kodwa umcimbi wokwethulwa kwaso wahlehliswa ngenxa yokungqubuzana phakathi kwamaqembu ayingxenye kahulumeni wobumbano.
Lokho kungqubuzana kwaqubulwa wukungavumelwani ngesiphakamiso saphambilini sikaGodongwana sokwenyusa iVAT ngo-2%. I-DA namanye amaqembu ayingxenye kahulumeni akuchitha ukwenyuswa kweVAT ngo-2%.
