UMENGAMELI wezwe uMnu Cyril Ramaphosa usedalule imizamo aphezu kwayo yokudala ukuthula, kuphele impi ephakathi kweRussia ne-Ukraine. URamaphosa usexoxisane nabaholi bamazwe ahlukene ngenhloso yokuba kuqhanyukwe nesisombululo sokudala uxolo phakathi kweRussia ne-Ukraine.
Ihhovisi likamengameli libike ukuthi ngoMgqibelo uRamaphosa ushayele uMengameli wase-Ukraine, uMnu Volodymyr Zelensky, ucingo bebhunga yona indaba yale mpi. Uphinde washaya ucingo elubhekise kuMnu Emmanuel Macron, onguMengameli waseFrance, nakuMengameli waseFinland, uMnu Alexander Stubb.
Kulindeleke ukuba aqhubeke ashayele ucingo nabanye abaholi bamanye amazwe abangaba neqhaza ekuxazululweni kwale mpi esinesikhathi eside iqhubeka. Ngokusho kwehhovisi likaRamaphosa, laba baholi bazibophezele ekutheni bazoyeseka imizamo yokuba kuxazululwe impi ephakathi kweRussia ne-Ukraine.
Kwenzeka lokhu nje, uZelensky usanda kuhlangana noMengameli wase-United States of America, uMnu Donald Trump, naye ozama ukuxazulula le mpi. Emhlanganweni obuseWhite House, eWashington DC, uZelensky ubephelezelwe ngabaholi bamazwe ehlukene ase-Europe.
Ngaphambi kwalowo mhlangano uMengameli waseRussia, uMnu Vladimir Putin uhlangane noTrump e-Alaska, njengoba uTrump ezama ukuthi kube noxolo. Nokho uTrump usezwakalise ukukhathazeka ngokuthi uPutin ubonakala engenamdlandla wokuba kusheshiswe izingxoxo zokuthula.
