UTHUMELA umyalezo kulabo ababona i-Orlando Pirates isiphumile emqhudelwaneni weCaf Champions League umqeqeshi wale kilabhu, uJose Riveiro (okwesobunxele).
IBucs izobhekana nePyramids yase-Egypt emlenzeni wesibili weSemi-final yeChampions League kusasa ngoLwesihlanu ngo-20h00, eJune 30 Air Defence Stadium, eCairo.
IBucs iya kulo mdlalo nje, ibambane nale kilabhu ngo-0-0 emlenzeni wokuqala obuseOrlando Stadium, eSoweto ngeledlule.
Kayinikwa lutho njengoba iya emlenzeni wesibili kwazise ithwale kanzima kule kilabhu ekubeni ibidlalela ekhaya.
Ngaphandle kwalokho, umqeqeshi wePyramids, uKrunoslav Jurcic (okwesokudla), usongele kanzima iBucs njengoba eshaya ngonyawo phansi ethi ngeke idabule kwezakhe ekhaya.
Ukhale ngamagoli amabili ezakhe aphikwe yiVAR, wathi bekufanele abalwe. Uthe kulokhu kuzophela amahlathi okucasha kwiBucs. Nabanye abathandi bebhola kabayiniki lutho iBucs kulo mdlalo.
URiveiro uthi nakuba benganikwa lutho kulo mdlalo, kodwa yena akuvumi aphonse ithawula ngoba bangawaphendula amatafula.
“Ngokwami, kasenzanga kabi emdlalweni wethu owedlule ngoba igoli esizolishaya ekuhambeni lizobalwa kabili.
“Yebo sibhekene nomdlalo onzima e-Egypt, okufanele silwe ngawo wonke amandla uma sifuna ukudlulela kowamanqamu. Ngiyaqonda ukuthi abantu abasiniki lutho, kodwa umyalezo engiwuthumela kubona ngothi yibhola leli, lizokumangaza.
“Lo mdlalo usavulelekile, abantu bazobhema bakholwe,” kusho uRiveiro
