UZONDWE amalungu omndeni wakhe umculi kamaskandi uKhuzani “iNdlamlenze” Mpungose ngoba ethi uyaphi ngaphansi kwenkampani yeZingane Zoma ngoba umsunguli wayo uMnu Shobeni Khuzwayo wabulala uMgqumeni “iBhova LikaDikadika” Khumalo (ongasekho).
UKhuzani uveze lokhu namhlanje ngoLwesithathu eCoastlands Hotel eMusgrave eThekwini. Ubekhuluma emcimbini ohlelwe iNdlamlenze Development Foundation, wokucotshelelwa kwamaciko ngolwazi lwezomculo. Uthe ukuphikelela kwakhe kuShobeni Khuzwayo kumsizile empilweni yakhe.
“Namanje kunabantu abangizondayo emndenini ngoba babethi ngithathe isinqumo esibi sokuya enkampanini yeZingane Zoma. Ukusebenza ngaphansi kwale nkampani kungisizile ngoba namhlanje ngiphumelele ngenxa yayo,” kusho uKhuzani.
Ugqugquzele abaculi ngokuthi abangakhohlwa yizinkampani ezibasizile. Uthi kumele zihlonishwe izinkampani ezihlonze ikhono lomculi.
“Ubaba uShobeni nguyena ohlonze ikhono lami. Ungiphe ithuba lokuthi ngimculele, wangiqopha. Ngithathe isinqumo enhliziyweni yami sokuthi angisoze ngixabane nomuntu owangisiza empilweni. Ngakho-ke ubaba uShobeni, namanje unengxenye yephesenti akalitholayo emculweni wami nakuba ngingasekho ngaphansi kwakhe,”esho.
Kule nkundla yokucotshelelwa kwamaciko ngolwazi, bekukhona abakwaSouth African Music Rights Organisation (Samro), abakwaSamra nezinye izinkampani zomculo
www.ilanganews.co.za
