USHAQISE amalungu omndeni umembeso nomashado womculi we-gospel, u-Ayanda Ntanzi. Kubikwa ukuthi lo mcimbi wenziwe isinyenyela, umndeni ungazisiwe ngawo.
Kuthiwa u-Ayanda wembese uNkz Gcina Zungu, eMtubatuba ngoMgqibelo, qede bashada. Ngokuthola kweLANGA, uNtanzi akahoshelani nomndeni wakhe nakuba kungaveli isizathu sokuxabana komndeni. Kuvela ukuthi lo mcimbi ufihlelwe ngisho abasondelene naye lo mculi, njengoba kuthiwa abanye babo baqale ukuthola izimemo ngoLwesine ebusuku, zithunyelwe ngohlelo lokuthi babone kanye (view once) kuWhatsApp, nokuthi bagqoke kanjani kanti abanye baze ngoLwesihlanu.
Ilungu lomndeni elixoxe neLANGA uMnu Khulekani Ntanzi okungumfowabo ka-Ayanda, lithe bawubone ezinkundleni zokuxhumana lo mcimbi. Uveze ukuthi kuno- kungaboni ngaso linye okukhona emndenini okuyikhona okwenze ukuthi bangamenywa emcimbini walo mculi. Uthi lilodwa ilungu lomndeni ebelikhona eMtubatuba.
“Kunezinkinga zomndeni engingathandi ukuzidalula, kodwa-ke ngoba yimina omdala ekhaya, yimina okufanele azilungise ngoba asisenabo abazali. Ngithemba uNkulunkulu ukuthi uzosilekelela, sibuyisane ngoba siyizingane zandawonye. Akukho esitshelwe khona ngawo lo mcimbi, kodwa sizwile ngenzwa bethi ukuthi uzobe embesa ngempelasonto ekhweni lakhe eMtuba,” kusho uKhulekani.
Uthi konke kwenziwe isigubhukane, ungazisiwe umndeni. Uveze ukuthi uNkz Zungu ngowesibili ukulotsholwa yilo mculi, njengoba ebebambisene nentokazi yakwaMkhize phambilini.
“Kusemahlombe ami ukuthi siyilungise le nkinga ngoba u-Ayanda useyingane, ezinye izinto uzenza ngendlela yakhe,” esho.
Imizamo yokuthola u-Ayanda kayiphumelelanga, belukhala lungabanjwa ucingo lwakhe. Kwi-video yalo mcimbi ebonwe yiLANGA, u-Ayanda ubonakala etshela isithandwa sakhe ukuthi uyasithanda wabe esesifaka indandatho.
