KUHLOSWE ukugqugquzela amatshitshi aqhamuka emalokishini ngokuhamba uMkhosi woMhlanga nokuhlolwa kwezintombi ngeMatshiwelele Festival ezoba seCurries Fountain, eThekwini ngoMgqibelo.
Omunye wabahleli baleFestival, uNkosikhona “Papa G” Gumede, uthe bakuqaphelile ukuthi izintombi eziningi zasemalokishini zikubona njengento yezintombi zasemakhaya ukuhamba umhlanga nokuhlolwa kwezintombi.
“NgeMatshiwelele Festival sithi akusukume zonke izintombi zikhuthalele usiko lokuhlolwa kwazo nokuhamba umhlanga. Akukhathalekile noma ngabe uqhamuka kuyiphi indawo futhi asifuni izintokazi ezisesilungwini zibone sengathi yinto yasemakhaya ukuhamba umhlanga,” kusho uPapa G.
Kule Festival eqala ngo-11 ekuseni kusasa kuboshelwe inqwaba yabaculi bakamaskandi okukhona kubona nezingqungqulu zabo. Kubona singabala uKhuzani, Igcokama Elisha, UGatsheni, Ntencane, Saliwa, Ndoni, Jaiva Zimnike, Ali Mgube, Skweletu, Shenge Wasehlalankosi, Mjabulisi, AmaYellowbone, Mjolisi, Nkeshemba, Maganga, Limit, Sminofu, Menzi, Umafikizolo nabanye abaningi. Kuphinde kube ngabanye abaculi noDJ abangekho kumaskandi, okungoBabes Wodumo, Dankie Boy, Big Nuz, DJ Mngadi, Ayarkhay, DJ Kotin, Ayanda Ntanzi, Thandeka Radebe, Sizwe Mdlalose nabanye.
Amathikithi okungena kuwona asatholakala eTicketpro ngo-R150 no-R200 ajwayelekile bese kuba awezicukuthwane abiza u-R1000.
