I-ACTIONSA KwaZulu Natal isiludlulisele kuNdunankulu wesifundazwe uMnu Thami Ntuli udaba lokushoda kwemishanguzo ezibhedlela zikahulumeni.
UMnu Zwakele Mncwango ohola leli qembu kulesi sifundazwe uveze ukuthi ubhalele uNtuli incwadi wamnikeza isikhathi sokuthi kushaye usuku lwezithandani umhla ka-14 February esephendule ngohlelo lokuqhamuka nesixazululo salokhu.
UMncwango uchaze isimo esibhekene nezibhedlela salesi sifundazwe njengenhlekelele.
Ukhale ngoMnyango wezeMpilo athe awufuni ukuphumela obala ngokuthi imishanguzo iyahanjiswa yini ezibhedlela.
Kuzokhumbuleka ukuthi phambilini uMncwango wabhalela uNgqongqoshe wezeMpilo uNkk Nomagugu Simelane Mngadi mayelana nalolu daba ekhala ngakho ukushoda kwemishanguzo.
USimelane Mngadi waphendula ngokuthi kungamampunge okushiwo nguMncwango ngokushoda kwale mishanguzo.
Kule ncwadi uMncwango ayibhalele undunankulu umyalele ukuthi ngokushesha aqhamuke nohlelo lokusabalalisa imishanguzo ezibhedlela, wukuqhamuka nohlelo lokulungisa umonakalo osudalekile ezinhlakeni zezempilo esifundazwe bese ethatha izinyathelo ezinqala kulezo zisebenzi ezithintekayo kulo monakalo.
