‘UHANJISWE yinkece ebingamugculisi’ abeyinikwa yi-Orlando Pirates uThabo Monyane (25) osanda kwehlukanisa nale kilabhu emuva kokuhlala iminyaka ewu-13 kuyona.
IBucs yethuse abathandi bebhola imemezela ukuthi ligqabukile ifindo lomshado phakathi kwayo nalesi sitobha.
UMonyane ukhulele enkulisa yeBucs njengoba efike emncane kwaze kwaba unyuselwa esikimini esikhulu.
Lo mdlali, nomunye uzakwabo odlala emuva, uPaseka Mako, naye osanda kudedelwa yiBucs, bakonjwa kwiKaizer Chiefs.
Bobabili laba badlali bakhonjwa kwiKaizer Chiefs.
Leli phephandaba lithole ukuthi abapathi bakaMonyane babe nezingxoxo nePirates, kwangavuyelwana.
“IBucs ibambe izingxoxo nomphathi wakhe, yakubeka efuna ukumnika kona kodwa yena washo okukhulu. Utsheliwe ukuthi ngeke ikwazi ukumunika leyo mali angamane ahambe.
“Okwenze kwalula ukuthi imdedele wukuthi ulimala njalo, futhi ahlale isikhathi eside ngaphandle. Nakuba kube buhlungu nakuyena ukushiya ikilabhu akhulele kuyona, kodwa ujabule ngoba usenayo ikilabhu kwazise kuthiwa usesayine neChiefs,” kusho umthombo waleli phephandaba.
Imizamo yokuthola uSteven Kapeluschnik, okuthiwa nguyena ophethe izindaba zalo mdlali, iphunzile njengoba ucingo lwakhe belukhala kodwa engalubambi.
Lo mdlali uthe: ”Njengoba sengivala isahluko empilweni yami, imizwa yami ihlukene phakathi. Kubuhlungu njengoba ngihamba kwazise leli yilona khaya ebengilazi. Ngakolunye uhlangothi, ngijabule njengoba ngiyoqala uhambo olusha.
<Ukujoyina isikhungo esinjengePirates ngineminyaka ewu-12 njengoba sengina-25, yinto enkulu kabi leyo. Ngikhulile manje njengomdlali futhi njengomuntu.”
