“SIMTHOLE egqitshiswe okwenja ubhuti wethu, kungekho ngisho okukhombisa ukuthi yithuna. Kuvele kwagujwa umgodi omncanyana, ongafiki ngisho okhalweni, ubezodliwa yizinja ngokukhulu ukushesha.”
Lawa ngamazwi kaNkz Sbongile Nkonyane, ongudadewabo kame- ngameli webandla lamaZayoni iNyonini Mission, umengameli uThamsanqa Nkonyane, okumbiwe isidumbu sakhe ngoMsombuluko, sigqitshwe emuva kwendlu ewurawondi, emishini yesonto oSizweni, eNewcastle. UNkz Nkonyane uthi le ndawo abathole kuyona isidumbu sikamfowabo, yindawo yokulahla udoti.
“Umfowethu wangcwatshwa ebusuku isinyenyela, singazi siwumndeni, kwathiwa ubefihlwa njengenkosi. Leya ndawo esimthole kuyona, ngeke ugqibe kuyona ngisho inja yakho oyithandayo, njengoba bekugqitshwe umfowethu. Bekungabonakali ukuthi kunethuna ngoba kuyindawo eqondile, kwase kubekwa amahlamvu.
“Kuyo le ndawo sibone ngokuthi bekunesihlabathi sasemfuleni esibukeka sisisha, kukhombisa nje ukuthi kukhona obekumbozwa, kodwa kungeyona indunduma etshengisa ukuthi yithuna,” esho.
Uthi emuva kokuba iNkantolo eNkulu eMgungundlovu ibanikeze igunya lokuyomba isidumbu sikamfowabo, iyalele isanciza sakhe (uNkonyane) uNkz Sizeni Mazibuko, uMaKhuzwayo, ukuba ayokhomba lapho agqiba khona uNkonyane. Uthi kuthe sekufanele akhombe, wathumela incwadi kubameli ethi uyagula.
“Siqhubekile nomsebenzi wokumba ngoba bekunesigatshana esithi uma engafiki ukuzokhomba, kuyofanele simbe lapho esisola ukuthi ugqitshwe khona. Uqhubekile-ke umsebenzi samba, ngenhlanhla ubekhona umfana owabhoboka, ethi bambiswa leli thuna ebusuku.
“Kuthe kungafika ngenhla kwamadolo ukumba, kwabe sekuqhamuka isikhumba senkomo, wahlaba ngefosholo umfana, kwaqhamuka ingubo yokulala. Waphinda wahlaba umfana, kwaqhamuka umqamelo nomfowethu egoqwe ngetshali. Kuphinde kwafakwa izimpahla ebezibukeka zizincane ngokomzimba, ebezingakhombisi ukuthi bezigqokwa ngumfowethu.
“Kuningi obekufakwe emgodini esingakuqondi kahle, obekusetshenziswa ngesikhathi kwenziwa lo mkhuba. Umfowethu ubengangcwatshiwe, kodwa ubegqitshiwe wena owabona inja obungayithandi, engafakiwe nasebhokisini. Ekhanda ubepoqokile, enegazi. Sisafuna siyohlolwa nesidumbu ukuze saneliseke ngembangela yokushona kwakhe ngoba ogile yonke le mikhuba, wasitshela ukuthi wayekhale ngesiyezi wase eyawa, washona. Lokhu kufihlwa kukamfowethu isinyelela, kuvusa izinsolo zokuthi kuningi okwakufihlwa,” kusho uNkz Nkonyane.
mthobisis@ilanganews.co.za
