BAZOBHEMA bakholwe abathandi bomculo kaSimphiwe Dana ozobe eseThe Playhouse, eThekwini kule mpelasonto eqeda iminyaka ewu-20 ekulendima yezomculo. Le ntokazi ithi izobe qhulula amanoni amasha namadala ngoMgqibelo mhla ka 14 June.
Ubiza ukukwazi ukwenza umculo isikhathi eside kanje njengento etshengisa impumelelo futhi okumele ibungazwe. Lo mculi waziwa kakhulu ngezingoma okungabalwa kuzo ethi Ndiredi, Mayine, Bantu Biko Street, Zandisile, Ndim’ Nawe nezinye. Exoxa ngomculo wakhe uthi: Ngangazi ukuthi ngifumbethe okwehlukile kulo mkhakha, ngangazi ukuthi ngibukeka ngendlela ehlukile, ngizwakala ngendlela eyahlukile futhi nezingoma engangifuna ukuzicula zazehlukile,” esho.
“Kwakuyindlela yokutshela abantu ukuthi ngivuleleni indlela, khona okuzayo okwehlukile kepha uma ngibuka emuva ngangixoxa indaba ukuthi kubaluleke kangakanani ukuzimela uzazi ngoba umhlaba uyohlezi ukutshela ukuthi kumele ube yinto eyehlukile,” esho. USimphiwe uzoba eshiyelana inkundla nabaculi abawu 13 kulamakhonsathi akhe amabili okungeyaseThekwini naseKapa. tzondi@ilanganews.co.za
