LUCKY CAIN noMENZI JELE
ILANGA elibalulekile namhlanje njengoba ziwu-3 kaDecember, emlandweni wesizwe saMaZulu.
Lolu wusuku okwagcotshwa ngalo iSilo uZwelithini kaBhekuzulu (uMdlokombane) njengeNgonyama yesi-8 yesizwe saMaZulu ngo-1971.
Ngokomlando walolu suku alina izulu, abantu bengangoZulu eya eMakheni, esigodlweni KwaKhethomthandayo, KwaNongoma, enyakatho-mpumalanga yeKwaZulu-Natal.
ISilo uMdlokombane sebuze ngenyanga kaMarch ngo-2021 ngemva kodunguzela isikhashana.
Ukuba sisadla anhlamvana ngabe sineminyaka engu-53 sihlezi esihlalweni.
ISilo uMdlokombane sabekwa esihlalweni sineminyaka engu-23 nje vo ngemva kokukhothama kukayise waso iSilo uBhekuzulu kaPhumuz’zulu owakhothama ngoSeptember wango-1968.
ISilo uMdlokombane sabanjelwa ubukhosi nguMntwana omkhulu waKwaNxangiphilile , uMcwayizeni Israel ngaphambi kokuthi sithathe isihlalo. ISilo uMdlokombane singuyise weSilo esisesihlalweni uMisuzulu KaZwelithini owamthola kuNdlunkulu wesithathu uMantfombi MaDlamini wasebukhosini baseSwatini
