UMASIPALA weTheku uthi usukulungele ukwamukela izivakashi ezilinganiselwa ku-1.2 million, ngamaholide ePhasika. Lokhu kuvezwe yiMeya, uMnu Cyril Xaba (esesithombeni), ngesikhathi ikhuluma esigcawini sabezindaba ngokuba sesimweni esikahle saleli dolobha ukubhekana nezinselelo zale mpelasonto emqoka ekhalendeni lamaKhristu.
UXaba uthe ukubalwa kweTheku njengenye yezindawo eziyikhulu ezihamba phambili ngezokuvakasha emhlabeni, kwenza liqhubeke nokuheha izigidi zabantu bakuleli nabakwamanye amazwe.
Uthe ukwamukela izivakashi eziwu-1.2 million, kuzokhulisa umnotho waleli dolobha ngemali elinganiselwa ku-R2.5 billion, kwakhe namathuba emisebenzi ewu-16 000. Uthe okubajabulisayo ngale mpelasonto wukuthi konke okuthinta ukulungela kwabo ukwamukela izivakashi, kumi ngomumo.
“Sikhuluma nje, ukugcwala kwezindawo zokulala sekungaphezulu kuka-60%, okusho ukuthi abantu banentshisekelo yokuvakashela eThekwini,” kusho uXaba.
Uthe ngasohlangothini lwamabhishi okuyiwona adlala indima enkulu ekuheheni izivakashi, awu-23 asesimeni esifanele, futhi akulungele ukuba abantu bangabhukuda kuwona. UXaba ubalule ukuthi le mpelasonto izophinde ihambisane nemicimbi, nayo edlala indima ekuheheni izivakashi, okubalwa kuyona iDoek On Fleek, iSjava 10 Year Celebration, okaBryan Adams, okaMandisi Dyantyis neminye.
Uthe abantu bangazithokozisa nangokuhambela izindawo zokuvakasha ezikuleli dolobha, okukhona kuzona i-Ushaka Marine World, iMitchell Park Zoo, iBotanic Gardens, nezinye. Okunye akuvezile wukuthi imicimbi ngeke iphele ngale mpelasonto, kodwa banekhalenda lonyaka wonke, elihlanganisa imicimbi okubalwa kuyo oweMetro FM Music Awards, ozoba ngasekupheleni kwale nyanga, owe-Africa Travel Indaba, ozoba ngasekuqaleni kukaNhlaba (May) lapho belindele izihambeli ezibalelwa ku-10 000, kube ngoweDisney On Ice, owe-UB40, iGas Motor Show, iDurban International Marathon, iHollywoodbets Durban July neminye yonyaka wonke.
Ngasonhlangothini lwezokuphepha, uXaba uthe bahlanganise izinhlaka okubalwa amaphoyisa angaphansi kweSAPS, awoMkhandlu weTheku (Metro), onogada bezinkampani ezizimele, uMnyango wezaseKhaya nezinye.
Uthe ngale mpelasonto kuzobe kusebenza amaphoyisa abalelwa enkulungwaneni, ukuqinisekisa ukuphepha kwezivakashi nalabo abazobe behambele amahlelo ahlukene ezinkonzo. Uthe bazoba nezivimbamgwaqo ezizokwenzeka emigwaqweni eyahlukene ngaphansi kwalo masipala.
