USUPHINDE wagqemeka ongeqiwa ntwala umkhakha wezomculo eNingizimu Afrika ngkudlula emhlabeni kukaDoc Shebeleza kungakapheli nesonto kudlule omunye umculi wodumo uWinnie Khumalo.
UShebeleza (51) ogama lakhe langempela uVictor Bogopane udlule emhlabeni ngoLwesine esesibhedlela kulandela ukuxinwa wukugula okumhlasele ngonyaka owedlule.
UShebeleza uqale ukuzakhela igama emculweni ngeminyaka yama-90 kulandela ukuphuma kwe-albhamu yakhe esihloko sithi S’kumfete.
Kule albhamu wayequkethe amanoni okubalwa kuwo Kumnandi, Ebumnandini, Ghesta Ghesta namanye.
Uke waba yingxenye yeqembu AmSkumfete elakhiqiza ingoma yodumo iTsipa Tsipa eyabe ihambisana nomdanso wakhona wokuminca izinqa.
Ungomunye wabaculi bekwaito abazakhele igama kulo mkhakha njengoba udumo lwakhe luze lwenza nentandokazi ye-hip hop yakuleli uCassper Nyovest waqamba ingoma ngaye.
Ilokhu ingene njalo imiyalezo yenduduzo kusukela kusabalale izindaba zokushona kwakhe.
