IKWAZULU Natal neMpumalanga yizona zifundazwe ezihambe phambili ngokutholakala kwabafundi ababanjwe bekopela ngesikhath kunezivinyo zikamatikuletsheni ngonyaka owedlule.
Lokhu kuvezwe yiCEO ka-Umalusi uMnu Mafu Rakometsi ngesikhathi ephawula ngemiphumela kamatikuletsheni okulindeleke ukuthi imenyezelwe ngokusemthethweni nguNgqongqoshe wezeMfundo eyisiSekelo eNingizimu Afrika uNkz Siviwe Gwarube ngoMsombuluko kusihlwa.
Umalusi uveze ukuthi babalelwa ku-407 abafundi ababanjwe bekopela lezi zivivinyo zika-2024 ezweni lonke.
URakometsi uthe iKZN neMpumalanga yizona eziqenqeleze phambili ngesibalo sababanjwe bekopela.
Uveze ukuthi iKZN kubanjwe abafundi abawu-195 kwathi eMpumalanga baba wu-74.
Uqhube ngokuthi nakuba lesi sibalo sehlile uma kuqhathaniswa neminyaka edlule kodwa kusaqhubeka nokumkhathaza ukuthi kusenabafundi abasabona kuyindlela yokuphumelela ukukopela.
Kubikwa ukuthi bangaphezulu kuka-800 000 abafundi abahlelele izivivinyo zikamatikuletsheni zika-2024.
NgoMsombuluko Umalusi ukuphasisile ukudedelwa kwale miphumela ezweni lonke njengoba eveze ukuthi nakuba kube nezihibe ezincane kodwa konke kuhambe ngokuhlelo ngalezi zivivinyo nokumakwa kwala maphepha.
