Ilanga News
Home 9 Featured Main 9 Uzilengisile obulale unina wengane yakhe ecasulwa wukuthi uye nayo ejoyintini

Uzilengisile obulale unina wengane yakhe ecasulwa wukuthi uye nayo ejoyintini

by | 12 March 2026

UZILENGISILE owesilisa waseMseleni, eMbazwana oshaye, wagwaza unina wengane yakhe washona, ngoba ecasulwa wukuthi uhambe nengane yabo waya ejoyintini.

UMnu Katidso Donald Nkalane okuthiwa ugwaze unina wengane, uNkz Zinhle Jabulile Mthembu, esithweni sangasese, kubikwa ukuthi utholwe ngamalungu omphakathi elenga esihlahleni. Kuthiwa ubecasulwa wukuthi uhambe nengane yabo waya endaweni yokucima ukoma.

Kubikwa ukuthi lesi sigameko senzeke ngeSonto kule ndawo, kulandela ukuba uNkz Mthembu ehambe nengane yakhe noNkalane, wayophuza. Ngokuthola kweLANGA, lezi zithandani bezihlala ndawonye. Kubikwa ukuthi isidumbu sikaNkz Mthembu, sitholwe sinenqwaba yamanxeba okugwazwa esithweni sangasese. Isidumbu kuthiwa besigcwele imivimbo, okuqinisekisa ukuthi uqale washaywa.

Umthombo okuleya ndawo utshele leli phephandaba ukuthi lona wesilisa kuyasolakala ukuthi umufi umbulale ebusuku ngoMgqibelo, wahlala nesidumbu sakhe njengoba size satholakala ngeSonto ekuseni.

“Kuthe uma esemshayile unina wengane, wabe esemgwaza ephindeleka ngoba ubelimele, enamanxeba. Uthe uhlalile naye ebusuku, kwathi ekuseni ezama ukumvusa, wangavuka. Ube esehamba eyolanda udadewabo (kamufi), eyomcela ukuba amsize, bahambise unina wengane yakhe emtholampilo ngoba engavuki.

“Udadewabo ufike wathola ukuthi useshonile unina wengane. Ube esebiza nomakhelwane ukuba bazombonisa umonakalo. Kungaleso sikhathi lapho umsolwa enyenye khona, wabaleka, ezitshela ukuthi umphakathi uzomshaya.

“Kube sekubizwa amaphoyisa, kwaqinisekiswa ukuthi (uNkz Mthembu) ushonile. Umphakathi ube usubheka umsolwa, wazithela phezu kwesidumbu sakhe silenga esihlahleni. Usebenzise intambo yesicathulo ngesikhathi ezilengisa, itholakale entanyeni,” kusho umthombo.

UMnu Xolani Zikhali, ongusihlalo wohlaka olubhekelele ukuphepha KwaMhlabuyalingana, uthe bawutholile umbiko ngalesi sigameko. Uthe abakutholile wukuthi indaba isuswe wukuhamba nengane kwalona wesifazane aye ejoyintini nayo.

Okhulumela amaphoyisa KwaZulu-Natal, uCol Robert Netshiunda, uthe amaphoyisa aseMbazwana aphenya icala lokubulala, emuva kokutholakala kowesifazane oneminyaka ewu-38, enamanxeba okugwazwa. Ukuqinisekisile ukuthi umsolwa utholakale ezilengisile esihlahleni. Amaphoyisa avule idokodo ngokufa komuntu.

Ezisematheni

I-MKP isifake isimangalo ifuna kucwaningwe amavoti ayo eThekwini

I-MKP isifake isimangalo ifuna kucwaningwe amavoti ayo eThekwini

IQEMBU uMkhonto weSizwe Party selifake isimangalo kwikhomishana yokhetho i-IEC kwaZulu-Natal njengoba lisola ukuthi kukhona okungahanjisiwe kahle ekubalweni kwamavoti ayo. Lokhu kuza emva kokuthi kube nemibiko yokungadonsi kahle kwemishini kwezinye izindawo okuthiwa...

Ogqame kokamaskandi ungena kowesicathamiya

Ogqame kokamaskandi ungena kowesicathamiya

BAJABULELE 'ukuqaqeka' kwezinkinga emculweni wabo abaculi besicathamiya, ngesikhathi kungenelela kuwona odume kakhulu kwezokuhlelwa kwemicimbi kamaskandi eThekwini. Lokhu kuvezwe ngabaculi bakacothoza, bejabulela ukungenelela kukaMnu Xolani Mcineka owaziwa...