SENZO SOKHELA
LILOLIWE izembe kubadlali beKaizer Chiefs njengoba kuvela ukuthi le kilabhu ihlela ukudedela ebabona bewuvucu ukuvula izikhala zabadlali ehlela ukubasayinisa uma kuvulwa iwindi lokudayiselana ngabadlali ngoJanuary.
ILANGA lihoshe ngemithombo yalo ukuthi le kilabhu isezinhlelweni zokudedela abadlali abangekho ezinhlelweni zomqeqeshi uNasreddine Nabi. “Nakuba ukhona umehluko obonakalayo selokhu kufike uNabi, kodwa izikhulu kunabadlali ezingeneme ngabo, ezihlela ukubadedela ngoJanuary. Abanye balabo badlali nguChristian Saile, uZitha Macheke, uPule Mmodi (osesithombeni), uLehlohonolo Matlou, uTebogo Potsane, uSibongiseni Mthethwa noMduduzi Mdantsane.
“Kukhona abadlali ezibabonile ezizozama ukuvala ngabo izikhala kanti abanye babo ngabangaphandle. UNabi ukhala ngokuthi yize abadlali bakhe abasebancane benza kahle, kodwa ukhakhayi kalukaqini kahle, ngeke bayibeke lapho afuna khona okwamanje le kilabhu,” kusho umthombo.
Imizamo yokuthola ukuphawula kukaVina Maphosa wezokuxhumana kwiChiefs iphunzile njengoba ucingo lwakhe belungangeni.
UNabi ukubeke kwacaca ukuthi abadlali anabo njengamanje akakwazi ukudlala ibhola lakhe ngabo. Uthe ukhululiwe ukufuna abadlali abadingayo.
