IPHINI likaKhomishana wamaPhoyisa, elisamisiwe emsebenzini, uJenene Shadrack Sibiya (osesithombeni), lizobuyela enkantolo ngoLwesibili oluzayo lomhla ka-29 kuMandulo (September), liyofaka isicelo sebheyili.
USibiya uboshwe ngoMsombuluko, wavela kafushane eNkantolo yeMantshi yaseRandburg ngoLwesibili, ngecala lokudlwengula intombazane eneminyaka ewu-18, eSandton, okuthiwa kwenzeke ngenyanga kaNhlaba (May) kulo nyaka.
Elinye icala athweswe lona, kuthiwa phakathi kukaMbasa (April) noNtulikazi (July), kuwo lonyaka, wayeqeqesha intombazane eneminyaka engu-16, ngezindlela zokwenza ucansi.
USibiya ugqunywe eKgosi Mampuru Correction Centre, ePretoria, ngoba kwesatshwa ukuthi uma eboshelwa ejele laseGoli, uzosebenzisa isikhundla sakhe, eqiswe noma adedelwe ejele. Abaphenyi bamacala bathi basalalela umyalezo oqoshiwe (voice note), lapho uSibiya ezwakala esabisa omunye wesifazane, ozoba ngufakazi uma sekuqulwa lawa macala, athweswe wona.
