UGWETSHWE udilikajele owesifazane oneminyaka ewu-22, wasoSizweni, eNewcastle, kulandela ukugonyuluka ngokubulala ingane yakhe eyayinonyaka owodwa izelwe.
INkantolo yesiFunda yaseMadadeni igwebe lona wesifazane ngalesi sigameko esenzeka ziwu-12 kuMfumfu (October) wangonyaka odlule, ngesikhathi ingane isele naye endlini. Ngokwesitatimende seNational Prosecuting Authority, (NPA), ingane yayihleli nabazali bayo ngosuku lwesigameko, uyise wayo wabashiya bobabili bedlala endlini.Â
Kuthiwa uyise wengane wabuya wafica unina wayo eyigonile, waqaphela ukuthi ingane yayinganyakazi, ngisho isishintshwa inabukeni. Kuthiwa lona wesifazane wabe esetshela uyise wengane ukuthi useyahamba, kodwa ngaphambi kokuba ahambe, uyise wathi makaqale ayivuse ingane.Â
Kuthiwa ingane kayizange ivuke, uyise wayo wabiza omakhelwane ukuba bazombukisa. Kuthiwa omakhelwane bafike bakuqinisekisa ukuthi ingane isishonile, kwabizwa i-ambulensi namaphoyisa, kwaqinisekiswa ukuthi ishonile, zabe sezimkhalela unina wengane.Â
Ngokwasenkantolo, kuvele ukuthi umbiko wokuhlolwa kwesidumbu, waveza ukuthi ingane yabulawa ngokuncishwa umoya. Ngesikhathi unina wengane egonyuluka ngakwenza, utshele inkantolo ukuthi isizathu esamenza wagila lo mhlola, yingoba wayekade exabene noyise wayo.Â
Enkantolo umbuso uphakamise ukuthi athole isigwebo esiqinile. umshushisi uthe, wayengenza ngenye indlela ehlukile kunokuba abulale ingane. Khona enkantolo, uyise wengane obengufakazi wombuso, uvezele inkantolo ukuthi usathuthumela ngemuva kwalesi sigameko, futhi sesimenze wangabethemba abantu besifazane.
Esitatimendeni, iNPA iveze ukuthi izimisele ukugcina umthetho ngaphandle kokwenzelela nokwesaba. Ithe izoqhubeka ivikele amalungelo abantu, ikakhulukazi izingane nabanye ababuthaka.
