KUSENTSHENZISWE ezemidlalo kushunyayelwa ivangeli lenhlanzeko nokuvikelwa kwemvelo emadolobheni aseMkhanyakude.
Iminyango eyahlukene kahulumeni KwaZulu-Natal ihlangane nezinhlangano zomphakathi, nomasipala waseJozini nowaKwaMhlabuyalingana kwaphunywa nekhambi lokuba kuhlanganiswe intsha ngenhloso yokuyeluleka ngokubaluleka kokongiwa kwemvelo.
Iminyango kahulumeni okungowokuThuthukiswa koMnotho nezokuVakasha eKZN, nowezeMpilo, Ezemvelo Wildlife, bebehlangene nabafundi bezikole ezingaphansi kwalabo masipala ababili.
Ngaphambi kokuba kuyiwe enkundleni, kuqalwe ngomkhankaso wokuhlanzwa kwamadolobha. Abezemvelo bebekhuthaza ukuvikelwa kwezihlahla nezilwane zasendle, bethi akufanele zibulawe singekho isidingo.
Ekhuluma neLANGA uMnu Siyabonga Myeni ,ongomunye wabahleli balo mkhankaso, uthe kubathokozise ukubona amalungu omphakathi ephume ngobungi, evumelana ngazwi linye lokuba kungalahlwa udoti noma yikuphi.
“Kunesaga esithi zibanjwa kwezikudlayo, yingakho nathi sibambe intsha ngezemidlalo. Emasontweni ambalwa siqale uhlelo lokuhlanza amadolobha, sibone intsha yakithi kuyiyona ehamba phambili kulolu hlelo. Abezemvelo banikele ngezihlahla ezitshalwe kumtapo wolwazi eNdumo.
“Banikele ngesihlahla samakinati ohlobo olungajwayelekile, isihlahla sama-orange kanye nezinye. Izikole ezinqobile zihlomule ngezinyamazane ezimbili, amajezi okudlala ibhola namabhola. Amaphoyisa akhiphe izexwayiso ezishubile kukhuzwa imiphakathi ukuba ingalinge ifune ukuzenzela umathanda okuphambene nemithetho elawula ukuvikelwa kwayo imvelo,” kuphetha uMyeni.
