UZOFIHLWA ngoMgqibelo, eBloemfontein, owaba ngomunye wabasunguli beCongress of the People (COPE), uMnu Mosioua “Terror” Lekota. ULekota, ushonele esibhedlela esiseGoli ngesonto eledlule, ngemuva kokuxinwa yisifo somdlavuza.
Uke waba nguNgqongqoshe wezokuVikela eNingizimu Afrika, kanti wabangundunankulu wokuqala, wesifundazwe iFree State, ngo-1994. Ushiye lapho wayoba ngusihlalo weNational Council of Provinces (NCOP).
ENgqungqutheleni ye-ANC, ayayise Mahikeng ngo-1997, uLekota wakhethwa waba ngusihlalo kazwelonke wale nhlangano, uMnu Thabo Mbeki, waba ngumengameli. ULekota, ubeyisethenjwa esikhulu sikaMbeki, kangangoba ukwehlulwa kwakhe (uMbeki), engqungqutheleni ye-ANC, eyayiseLimpopo ngo-2007, kwaholela ekutheni uLekota, uMnu Mbazima Shilowa, noMnu Mluleki George (naye ongasekho), bashiye i-ANC, basungule iCOPE ngonyaka olandelayo.
Okhulumela iCOPE uMnu Pakes Dikgotsi, uthi bazohlangana nomndeni ngoMsombuluko, bese bedalula izinhlelo zomgcwabo.
“Maningi amaciko afuna ukuba khona emngcwabebi kaLekota. Esingakuqinisekisa ukuthi uzogcwatshwa ngokwezinga lesifundazwe (category 2), ngoba waba ngundunankulu waseFree State. Umngcwabo uzoba seBloemfontein,” esho.
ULekota uhlalile eClermont, eThekwini, eyisandla sokuphosa sikaMnu Archie Gumede, owaba ngumengameli wokuqala we-United Democratic ovement (UDF), eNatal. uLekota waboshwa ngo-1974, ngokuhlela iViva Frelimo Rally”, eyayise Curries Fontein Stadium, eThekwini, wagqunywa iminyaka ewu-10 eRobben Island. Ngaleso sikhathi wayeyilungu leBlack Consciousness Movement (BCM).
Ushiye emhlabeni umkakhe, uNkk Cynthia Lekota (uMaShange), ongowokuzalwa eClermont, izingane ezine, nabazukulu.
