BHEKI NDLOVANA
YEHLISWE ngo-25 basis point (0,25%) inzalo yemalimboleko.
Lolu guquko lumenyezelwe nguMnu Lesetja Kganyago onguMbusi weSouth African Reserve Bank (SARB), namhlanje ngoLwesine ntambama.
Ukwehliswa kwenzalo yemalimboleko kulindeleke ukuba kwehliswe kancane umthwalo kubathengi abanezikweletu ezinkulu okubalwa kuzona ezemizi nezezimoto.
Bekuvele kulindelekile ukuba iSARB iyehlise inzalo yemali mbolelo njengoba isimo sokwehla kwamandla emali sesingcono kakhulu uma kuqhathaniswa naseminyakeni embalwa edlule, ikakhulukazi kusukela ngesikhathi kubheduka iCovid-19.
Sekungokwesibili iSARB ithatha isinqumo sokwehlisa inzalo yemalimboleko izikhawu zilandelana ngemva kokuhlala isikhathi eside iphezulu futhi ingaguqulwa. Ize yaqala ukwehliswa ngoSeptember kuwona lo nyaka.
Abahlaziyi bezomnotho bathi kulindeleke ukuba iSARB iqhubeke nokuyehlisa inzalo yemalimboleko nangonyaka ozayo.
Isimemezelo esilandelayo seSARB mayelana nenzalo yemalimboleko siyomenyezelwa ngoMasingana (January) wonyaka ozayo.
