UMENGAMELI Cyril Ramaphosa uzokhuluma nezwe namuhla ngeSonto ngezinsolo ezabekwa nguKhomishana wamaPhoyisa KwaZulu-Natal, uLt-Gen Nhlanhla Mkhwanazi.
Ngesonto eledlule, udaba lukaMkhwanazi belusematheni, ngemuva kokuba ebize isithangami sabezindaba, wadalula izinsolo zokugxambukela emsebenzini wamaphoyisa, waninda izikhulu okubalwa kuzonk uNgqongqoshe wamaPhoyisa uMnu Senzo Mchunu.
Umengameli, ekubuyeni kwakhe eBrazil, engqungqutheleni yeBrics, utshele izwe ukuthi usafune umbiko ogcwele ngalolu daba, ngaphambi kokuthatha izinyathelo ezifanele.
UMkhwanazi uthole ukwesekwa yiqembu le-Action SA, nezinhlangano ezilwela amalnngulo abantu, nabaBandla ezenkolo. I-Action SA ngoLwesihlanu ibenombhikisho wokweseka uMkhwanazi.
I-Action SA ithi uRamaphosa uzithele ngabandayo, ngokungazisukumeli lezi zinsolo nokushesha, yize zibuyaci.
“Uzokhumbula ukuthi umengameli wahoxisa uhambo ayenalo ngesikhathi iDemocratic Alliance (DA), yesabisa ngokuthi izophuma kuGovernment of National Unity (GNU). Kulokhu uzwile ngalokho okushiwo nguMkhwanazi, kodwa wahlala eBrazil, esikhundleni sokuthi abuye ngoba yizinsolo ezibucayi lezi.
“Asikholelwa ukuthi amakhonishana angaba yisixazululo, sifuna uNgqongqoshe uSenzo Mchunu akhonjwe indlela. Siyayincoma iDA, ngoba isimvulele icala ngokuqamba amanga ePhalamende, ephika ukuthi uyazana noMnu Brown Mogotsi, uMkhwanazi amsola ngokuthi uyagxambukela ekusebenzeni kwamaphoyisa,” kusho uMnu Zwakele Mncwango ongumholi we-Action SA eKZN.
Kubantu asebegxeke uMkhwanazi, nguMengameli wamaJaji kuleli, uNkz Mandisa Maya, othe makaqhamuke nobufakazi ngoba athi kunokusebenzisana phakathi kwezinhlaka zomthetho nezigebengu kuleli zwe. Uthe izinhlaka zomthetho nezobulungiswa zizimele, azihlangane nezigilamkhuba.
UMvikeli woMphakathi uNkz Kholeka Gcaleka uthi ubelindele ukuthi izinsolo ezinjena, uMkhwanazi azilethe ehhovisini lakhe, angegijimeli kwabezindaba.
Umhlaziyi wepolitiki ozinze e-University of KwaZulu-Natal, uMnu Zakhele Ndlovu, uthi mancane amathuba okuthi uNgqongqoshe uMchunu, angakhhonjwa indlela.
“Uzokhumbula ukuthi uMchunu ngumholi oweseke uRamaphosa, abanye abaholi sebemhlehlele eKZN. Into azoyenza wukusungula ikhomishana ezophenya, noma amnike esinye isikhundla kuKhabhinethi, njengoba enza kuNgqonqgoshe uThembi Simelane,” kuhlaziya uNdlovu.
