INTATHELI YELANGA
ZIPHUME ngesamagundane izintatheli zeLANGA emcimbini wokushiswa kothi weSilo uMisuzulu kaZwelithini obusesigodlweni eMashobeni, KwaNongoma, ngoLwesithathu. Lo mcimbi wokushiswa kothi kusuke kungowokuqeda kokuzila kweSilo ngemuva koMkhosi wokweShwama.
INdlulamithi ivele yabhodla umlilo ngesikhathi ibona izintatheli zaleli phephandaba, yazikhaca ngenhlamba ikhuluma ngesiNgisi, ithi zibhala udoti ngayo.
IMbube iphume ngesango lesibaya elingenhla, kukhombisa ukuthi kukhona eyokuthatha endlini. Kuthe isendleleni ebheke kuleyo ndlu, yazithela phezu kwazintatheli, zimgade ngakhona ukuze zithwebule izithombe, okuyilapho kusuke khona isidumo yathi:
“Kangibafuni laba lapha ekhaya, babhala udoti ngami. Baxosheni! Kangibafuni ngempela,” isho ngolaka.
Ngaleso sikhathi iyalele abaqaphi bayo ukuba baye kuzona, bacishe konke obesekuqoshiwe. Nebala benze kanjalo onogada. Size sayongena endlini iSilo silokhu sibhonge njalo, kuzwakala ukuthi sithukuthele.
Izintatheli zaleli phephandaba zikhwice imisila zawushiya usaqhubeka umcimbi ngoba ukuphepha kwazo bekusengcupheni emuva kwenkulumo yeMbube.
