ZIYAWUSHAYA maduzane kumsakazi woKhozi FM, uBingelela Mpanza. UBingelela osakaza uhlelo lukamaskandi ngeMigqibelo oKhozini FM, ulotsholwe waqedwa ngoMgqibelo, wambeswa, kwafakwa nendandatho yesethembiso somshado.
Lo mcimbi obuhlanganise imindeni yalezi zithandani ubukwaMpanza, kwaDabhasi, KwaNongoma. Ubelotsholwa ngusomabhizinisi uMnu Siyabonga Dlamini waseMondlo, eVryheid.
UBingelela utshele ILANGA ukuthi izingxoxo zosuku lomshado ziqaliwe. Uthe abakhongi bathe bacela ziwushaye kuNhlangulana (June) kuwona lo nyaka.
“Kuwona impela lo nyaka ziyawushaya ngoba abakhongi bafuna usuku oluseduzane,” kusho uBingelela.
Uthe sekunesikhathi eside bebambisene kwezothando noDlamini. Uthe baqale ukwazana ngokusizana kwezamabhizinisi, njengoba naye uBingelela esegxile kwamanye amabhizinisi ngaphandle komsakazo, futhi usizakala kakhulu kuwona, elekelelwa nguDlamini.
“Siyasebenzisana noDlamini, izinto zami eziningi eziseceleni, zimenenjwa nguyena. Eminyakeni edlule, ngiqale umcimbi womculo engiwenza ngakithi kwaNongoma minyaka yonke, umasingcwabisane wami esengiwuvulile, konke nguyena obheke engikwenzayo,” esho.
Uthi nakuba ebelufihlile uthando lwabo, kodwa bakhona abebenalo ulwazi. Uthe ubefihla sonke lesi sikhathi ngoba abanye abaxhasi bayagqoza ukuxhasa izinhlelo ezihlelwa ngabesifazane uma sebephumele obala ngezothando lwabo.
“Bengifihlile impela kodwa-ke kwazivelela ngoba bese kufike isikhathi,” esho.
Ucacise nokuthi belungekho uthando phakathi kwakhe nomculi kamaskandi uMayoghurt “iBliss” Jama. Uthi bebeqhuba umdlalo (content) wasezinkundleni zokuxhumana.
“Kuphelile manje ukudlala imidlalo yasezinkundleni zokuxhumana. Ebesikwenza neBliss, besidlala imidlalo eyenziwa ngabantu abaningi ezinkundleni zokuxhumana,” kusho uBingelela.
