AMAKHOSI, abaNtwana baseNdlukulu kaZulu, nabadididyeli bamabutho, bakhuze ibhadi ngokwedelelwa kweSilo uMisuzulu kaZwelthini, njengoba kusabalale ezinkundleni zokuxhumana umlisa ozibiza ngoMax Makhanya, oshiya angalazi kuyona iMbube.
Namuhla ngoLwesibili bekubizwe isithangami sebezindaba eMhlanga, eThekwini, lapho lezi zinhlaka zobuholi bomdabu, bezikhuza khona lo mhlola.
Basole kakhulu ubukhosi besizwe sakwaMakhanya, KwaSobonakhona, eMbumbulu, ukuthi buzithela ngabandayo, abukusukumeli ukwehliswa kweSilo isithunzi, ngumuntu ongaphansi kwabo.
INkosi uKhethukuthula kaBhekizitha Makhanya, ohola lesi sizwe ubengekho esithangamini nasemhlanganweni oyinguyazana oqale wabakhona ekuseni, kodwa bekukhona UMnu Mbongeni Makhanya, ongundunankulu walesi sizwe.
Abaholi bomdabu abebekhona bebebhodla umlilo, bethi iSilo sesedelelwe kakhulu, futhi kayikaze yenzeka into enjenga ebukhosini bukaZulu.
“Sisukume ngoba njengamakhosi singabavikeli besihlalo sobukhosi. Uma kuzoba khona umuntu ozogcwaneka kwiSilo sethu ezinkundleni zokuxhumana, yinto engeke yamukeleka leyo,” kusho iNkosi yesizwe saKwaNgenetsheni, eVryheid, uMntwana uLanga kaBhukumuzi Zulu.
Uma egcona iSilo uMax Makhanya, uthi ukhuluma egameni “lebutho lakwaMakhanya nabantu abamthumile”.
UNdunankulu wesizwe sakwaMakhanya, ucele abezindaba ukuthi bakhishwe ngesikhathi sekukhuluma yena.
“INkosi (uMakhanya) ingidonse ngendlebe yathi lolu daba ngingalukhulumi nabezindaba,” esho.
menzi.jele@ilanganews.co.za
