UMFANISE nowesizwe unkosikazi wakhe umculi kamaskandi uKhuzani “iNdlamlenze” Mpungose egcagcelwa uNkz Nonduduzo Mathenjwa ngoMsombuluko eMandaba eNkandla.
Uthe ukuba ubeyinkosi yesizwe (uKhuzani), bekunguyena uKaMathenjwa obezomzalela inkosi. Ukusho lokhu ebabaza ukwesekwa ngabantu ngeminikelo kulo mshado. Uthi zingaphezulu kuka-40 izinkomo ezifikile ekhaya kwaMpungose.
“Izindleko eziningi zomshado ngisekwe ngabantu abangiphe izipho. Ngiyayiqala into enjena. Ngiyabonga kakhulu kubona bonke abalule isandla,” kusho uKhuzani.
Ngakolunye uhlangothi uNkk Nonduduzo uKaMathenjwa Mpungose uthe usazoqhubeka nokuphila impilo eyimfihlo. Uthe ukubonakala kwakhe emphakathini njengoba esegcagcile, akuchazi ukuthi usezobonakala emphakathini ewuvanzi. Uveze ukuthi nezinkundla zokuxhumana, usazozigwema. “Lokhu obekuhlupha abantu ngokungabonakali kwami, kusazoqhubeka,” esho.
Kulokho uKhuzani, uthe akukho okushintshile ngaye ngoba eseshadelwe. Uthi ufike esinqumweni sokushada unkosikazi wakhe ngenxa yokuthi uyasiqonda isimo somsebenzi wakhe wokuthandwa ngabantu ngokuthi ungumculi.
“Umsebenzi esiwenzayo usayigcaluzisa kakhulu. Kwesinye isikhathi amaholidi kaZibandlela aphela ngingakaze ngihlale ekhaya, kodwa konke lokho uyakuhlonipha ngoba uyawazi umsebenzi wami engiphila ngawo,” esho.
JOHN HLONGWA/ILANGA
Lo mgcagco uhanjelwe osomabhizinisi abaningi. OwayenguMengameli wezwe uMnu Jacob Zuma, ubeyingxenye yawo. Ngaphambi kokuba kugcagcwe, kuqale ibandla lamaNazaretha lenza usiko lwawo esigcawini okuhlanganisa ukukhulekelwa kwaso.
JOHN HLONGWA
Mthobisis@ilanganews.co.za
