KUSOLWA abazali ngokugxambukela ngokweqile embangweni wezikhundla zokuqashwa kothisha ezikoleni. Abazali basolwa yiSouth African Democratic Teachers Union (Sadtu) KwaZulu-Natal ngokuthi babuye baxove izinto.
UNobhala wale nyunyana uNkz Nomarashiya Caluza uthi kunezigungu zezikole eziphula imithetho yomqashi (uMnyango wezeMfundo) bese kuba nemibango yezikhundla ephetha ngokudutshulwa kothisha.
Uphawule ngalokhu kuleli phephandaba njengoba kubhokile ukudutshulwa kothisha njengoba kuyisikhathi sokugcwalisa kwezikhundla eziphezulu ezikoleni.
“Sixakwe ngabazali emubangweni wezikhundla ezikoleni. Yibona abazosibulalela izikole,” kusho uNkz Caluza.
Uthi ezinkingeni ezikhona kwezinye izikole, kuputshuka izinkulumo zamatulo ezigungu zezikole, zihlela ukuthi amaphuzu azokwabiwa kanjani kwabahlonzelwe inhlolokho kulezo zikhundla. Uthi lokhu kudala uhlevane emphakathini okwenza lungabi bikho uzinzo ezikoleni.
“Kuyamangaza nokubona abazali bebhikisha bevala isikole ngoba bethi abamfuni uthisha othile esikoleni ekubeni elethwe wuMnyango wezeMfundo. Abanye abazali bavuma ukusetshenziswa kuliwa izimpi zangaphakathi ezikoleni. Siyakugxeka kakhulu lokho ngoba abazali yibona abazosibulalela izikole,” kusho uNkz Caluza.
Uthi enye inkinga edalwa ngabazali ezikoleni ngeyokuthi bafuna kusebenze abantu bendawo. Utshele leli phephandaba ukuthi awukho umthetho onjalo eMnyangweni wezeMfundo. Uveze ukuthi kufanele ihlonishwe imthetho ebekwe wuhulumeni ukuze kungabi bikho izinkinga eziholela ekubulaweni kothisha.
“Le nkinga yenzeka nasohlelweni lokuthuthwa kothisha ezikoleni zabo, behanjiswa kwezinye izikole uma kunciphe isibalo sabantwana kulezo zikole ebekade befundisa kuzona ngaphansi kohlelo lwePost Provison Norm (PPN). Abazali badala uqhekeko bethi abamfuni uthisha omusha olethwa esikoleni ekubeni bengamazi nokumazi. Banesandla abazali ezinkingeni eziningi ezikoleni,” esho.
Utshele ILANGA ukuthi ezigamekweni eziningi zokufa kothisha bedutshulwa, kusuke kuyizinkinga zabo zasemphakathini bese bebulawela ezikoleni. Uthi izelelesi zisebenzisa kakhulu ithuba ngesikhathi kunezikhundla zemisebenzi ezivulekile ezikoleni ukuze kuzosolwa imibango yangaphakathi.
Okhulumela uMnyango wezeMfundo KwaZulu-Natal, uMnu Muzi Mahlambi, uthi izigungu zezikole kufanele ziqinisekise ukuthi azikho izinxushunxushu ezikoleni.
“Amatulo ahlelwa ngezikhundla, akukho emthethweni lokho. Yingakho izigungu siziphuca amandla uma sesithole ukuthi kunezinxushunxushu bese uhlelo lokuqasha lusingathwe wumnyango,” esho.
mthobisis@ilanganews.co.za
