UGUBHE iminyaka ewu-50 edla anhlamvana ngesitayela usomabhizinisi uNomfundo Mcoyi ongumnikazi wenkampani yabangcwabi Icebolethu othathe izinsuku ezinhlanu. UNomfundo uthathe abangani bakhe nalabo asondelene nabo wayochitha izinsuku ezinhlanu eCape Town, kusukela ngoLwesine kwaze kwaba uMsombuluko. Lo mcimbi uqale ngokuntweza ngesikebhe ebhishi laseKapa, ngoLwesihlanu izicukuthwane zithokoze eCarvali Wine Estate emcimbini obunengqikithi yezimbali.
Kulo kunandise uBrenda Mtambo. NgoMgqibelo umcimbi udlulele endaweni yomtakabani eMarble eV&A lapho izicukuthwane zithokozele umculo obuqhululwa iBoom Shaka, TKZee, DJ Bongz noDJ Happygal. Lo mcimbi ubugabe ngengqikithi yeminyaka yama-70s njengoba izihambeli zawo bezigqoke ngesitayela sale minyaka. Kujuxuzwe kwaze kwashaya phakathi kwamabili kanti nezidlo neziphuzo bezilokhu ziqhamuke njalo.
NgeSonto lo mcimbi udlulele kwesinye isigaba njengoba uqhubekile, izicukuthwane zaqhubeka nokuthokozela ngezindlela ezahlukene kunandisa abaculi okubalwa kubo uZee Nxumalo, Dlala Thukzini, DJ Tira nabanye. Phakathi kosaziwayo nezicukuthwane ezibonakale kulo mcimbi kubalwa uCarol Bouwer, Nonku William, Minnie Dlamini, Mlamuli Nxele, Sizwe Mdlalose, Takie Dube, Zandile Tembe, Siya Mhlongo nabanye abaningi.
Lo mcimbi kulindeleke ukuba uphothulwe namhlanje ngoMsombuluko ngesidlo sakusihlwa njengoba uzoqala ngenkonzo lapho kuzoshiyela inkundla abaculi bowokholo uNtokozo Mbambo, Nqubeko Mbatha noDumi Mkokstad.
