LUCKY CAIN
Uvukwe wumunyu uBabes Wodumo ngesikhathi enandisa emcimbini i-Inkasi Experience obusePrincess Magogo Stadium KwaMashu ngeSonto.
UBabes ubenandisa kulo mcimbi ngehora lokuhlonipha umyeni wakhe uMampintsha, ongomunye wabadlala indima emqoka ekusungulweni kwawo.
Ngesikhathi uBabes enandisa bekubekwe isithombe sikaMampintsha phambili. Wehluleke wukuzibamba, wasidinda isililo ngesikhathi esenandisa eduze kwaso.
Lo mcimbi ubugubha iminyaka eyishumi wasungulwa. Izinkumbi zabathandi benjabulo beziphume ngobuningi ukuyothokoza njengoba bekunandisa kuwona abaculi noDJ abahlukene.
Phakathi kwabanandisile kubalwa uMalusi Mbokazi, iMalini, uKhuzani, uMthandeni SK, uDJ Sabby, uSlender DA Dancing DJ, uProfessor, uGoldmax, uMahwoo, uDladla Mshunqisi nabanye abaningi.
