PHUMLANI GAMA
UNXUSE izakhamizi zaKwaZulu-Natal ukuba zihlale emak zibhaya zibungaze usuku lukakhisimusi nemindeni yazo ukuze kugwemeke izingozi ezingesadingo umholi we-Action SA KwaZulu-Natal, uMnu Zwakele Mncwango.
UMncwango ubekhuluma neLANGA ngemuva kokuba leli phephandaba belixhumana nabaholi abehlukene ukuthola ngezinhlelo zabo zokubungazwa kwalolu suku. uthe uzobe ekubo KwaNongoma, ebungaza nomndeni wakhe. Uthe ziningi izinkinga ezidalwa wukuphuma kwabantu emakubo beyozijabulisa ngaphandle.
- UMnu Siboniso Duma ongusihlalo we-ANC KwaZulu-Natal, uthe ngalolu suku uzobe ezihlalele kubo. “Iyodwa into engangikhipha ekhaya okuwukuthi ngiyobuka ibhola njengoba emakhaya eMzumbe kuyaye kube nemidlalo yebhola. Nokho-ke ngizobe ngicuphile ngasohlangothini lwami njengoba isifundazwe sethu sibuye sibe nenkinga yokuhlaselwa yizikhukhula,” esho.
- Umholi weNFP uNkz Mbali Shinga obuye abe ngungqongqoshe woMnyango wezeNhlalakahle nokuThuthukiswa koMphakathi KwaZulu-Natal, uthe usevele useqalile ukubungaza nemiphakathi yezifunda ezahlukene. “Ngalolu suku ngizovukela kwesinye sezibhedlela zesiFunda uGu lapho ngizobe ngihambise izipho komama bezingane ezizobe zizalwe ngalolu suku. Ngokuhamba kosuku ngizobe sengiqhubeka nomsebenzi esengivele ngiwuqalile wokuhlangana nezaguga ngiziphe oncamnce,” esho.
- UMnu Blessed Gwala ongusihlalo we-IFP kuzwelonke, uthe ngalolu suku uzobe esesizweni sakwaMzimela eMthunzini emcimbini wokubungazwa kwempilo yeNkosi uMpiyezintombi kaLindelihle Mzimela osekuphele iminyaka eyishumi yabizelwa koyisemkhulu bayo. “Le nkosi ezobe ikhunjulwa ingukanina wami. Sizalwa nayo kwaNgema,” esho.
- UMnu Francois Rodgers ohola i-DA KwaZulu-Natal, uthe uzobe ezihlalele emzini wakhe oseKokstad namalungu omndeni wakhe. “Leli holidi lezinsuku ezimbili libalulekile kithina, ngizobe ngisekhaya namadodakazi ami. Kuzobe kukhona nendodakazi yami endala eshadele eMalawi ezobe ikhona ihamba nomndeni wayo. Nokho-ke ngizobe ngitholakala noma ngasiphi isikhathi uma ngidingeka ngokomsebenzi wami engijutshelwe kuwona wuhulumeni waKwaZulu-Natal,” esho.
