UMENGAMELI Cyril Ramaphosa useyikhahlele ngazo zombili imibiko ethi amasosha akuleli aseDemocratic Republic of Congo kawanakiwe njengoba ebhekene nempi yeqembu lamavukela-mbuso elibizwa ngeM23.
Edlulisa amazwi enduduzo emindenini yamasosha awu-13 adlule kule mpi eqhubekayo, uRamaphosa uthe ajutshwe yi-Southern African Development Community ngenhloso yokugcina ukuthula kule ndawo futhi athola ukwesekwa okufanele.
URamaphosa uthe seziqalile izinhlelo sokubuyiselwa kwemizimba yala masosha eNingizimu Afrika.
Umengameli uzwakalise ukukhathazeka ngezinkulumo eseziqubukile ngokushona kwala masosha ngesimo sezokuphepha kwezwe nokubhekana nezimpi.
URamaphosa uthe uNgqongqoshe wezokuVikela kuleli uNkk Angie Motshekga noMkhuzi wamaSosha e-SANDF uRudzani Maphwanya noKhomanda wamaSosha ojutshwe eDRC bayaqinisekisa ukuthi amasosha akuleli athola zonke izinsiza azidingayo futhi asekwa ngokufanele.
