INHLANGANO yakwaHollywood ilokhu iqhubeke njalo nokuxhasa osomabhzinisi abasakhula nabathathwa njengengxenye enkulu yokukhula komnotho wesifundazwe iKwaZulu-Natal. Le nhlangano beyibambe amaBambelela Business Awards ngenhloso yokuqhakambisa iqhaza elibanjwa osomabhizinisi ekufukuleni umnotho. Ekuvuleni amathuba omsebenzi, ukuqinisekisa intuthuko emphakathini ikakhulu ezindaweni lapho uxhaso lungekho khona nokwesekwa kwamabhizinisi kuyimvela kancane. Le nhlangano ithi njengoba isidingo somnotho onozinzo silokhu sikhula, imikhankaso etshala kosomabhizinisi abasakhula ibalulekile ekukhuliseni umnotho esifundazweni sonke nasekushintsheni izimo ezinzima ezibhekene nomphakathi.
Le mihlomulo yeBambelela ngunyaka wesithathu yenzeka eKZN. Kulo nyaka iHollywood Foundation yenyuse utshalo mali kusukela kuR1 million yafinyelela ku R1 135 000 nokuyimali ezohlukaniselwa osomabhizinisi abehlukahlukene kulesi sifundazwe abangenele le mihlomulo. Bathi ziningi izicelo ezifakiwe kulo nyaka ezivela ezingxenyeni ezahlukene zesifundazwe, nokungamabhizinisi awu 128 avela eMpangeni, eRichards Bay, eMgungundlovu, eGreytown, ePort Shepstone nasoLundi.
Okuqaphelekile wukuthi amabhizinsisi abesifazane asaqhubeka ngokuba ngamanye ahamba phambili ekufukuleni umnotho.
AbeHollywood Foundation bathi amaBambelela Business Awards akusiwo awokusiza ngemali kuphela. Kepha lo mkhankaso uyindlela yokuqinisekisa ukuthi amabhizinisi ayakhula futhi avulelwe namathuba okuxhumana namanye amabhizinisi ukuze akwazi ukukhula aye phambili.
UNkk Vuyisile Ngobese wezokuXhumana kwaHollywood Foundation uthi: “AmaBambelela Business Awards alokhu eqhubekile ukuveza amathuba akhona emphakathini yasemakhaya nasemalokishini eKZN. Ngalo mkhankaso sitshala ngenhloso kumabhizinisi angagcini ngokukhulisa umnotho kodwa anegalelo emphakathini akuyo,”esho.
Uthi kubalulekile ukesekwa kwamabhizinisi akhulayo ukuze kukhule umnotho wasekhaya ngoba amabhizinisi amancane yiwo agcina akha amathuba omsebenzi. “Ngokuxhasa osomabhizinisi ngemali namathuba okuzithuthukisa sifaka isandla ekusimameni kwawo isikhathi eside ekhulisa nomnotho,” esho.
UNdunankulu waseKZN, uMnu Thami Ntuli uwashayele izandla amaBambelela Awards ngokufukula umphakathi. “Njengohulumeni wesifundazwe sizinikele ekusebenzisaneni nezinhlangamo ezinjengeHollywood Foundation ukwandisa amathuba, ukufukula abantu nokwakha iKwaZulu-Natal enamandla ehlanganisa wonke umuntu,” esho.
Kwabawu 20 abahlomulile:
Ophume phambili uthole uR145 000
Ophume isibili uthole R115 000
Ophume isithathu uthole R85 000:
Abawu 17 bathole isamba sika R45 000 ngamunye
Kwiminxa ehlukene kuhambe kanje:
Facebook Marketing Competition: uhlomule uR12 500
Early Bird Pitchers Award: uhlomule uR6 250
Best presented exhibition stand: uhlomule R6 250
