IPHINI likakhomishana wamaPhoyisa kuzwelonke uJenene Shadrack Sibiya lithi liyakwemukela ukuqokwa kwekhomishini ezophenya ngezinsolo zenkohlakalo embuthweni wamaphoyisa.
NgeSonto uMengameli Cyril Ramaphosa umemezele ikhomishini yophenyo ezophenya ngezinsolo zikaLt-Gen Nhlanhla Mkhwanazi onguMkhuzi wamaPhoyisa kwaZulu-Natal zokugxambukela emsebenzini wamaphoyisa kukaNgqongqoshe wawo uMnu Senzo Mchunu, yena uSibiya, nezinye izikhulu ezinhlakeni zezobulungiswa.
Ekhuluma neSowetan uSibiya, uthe abameli bakhe basafunda incwadi ayithunyelelwe nguKhomishana wamaPhoyisa kuzwelonke uLt-Gen Fannie Masemola ethi makathathe “ikhefu elikhethekile” (special leave), ngesikhathi esaphenya izinsolo zikaMkhwanazi ngaye (uSibiya). Uthe le ncwadi kayilibeki ngembaba elokuthi unikwe “ikhefu elikhethekile”.
Isinqumo sikaMasemola siza ngemuva kokuba ngeSonto uRamaphosa ememezele ukuthi uMchunu uzothatha ikhefu elifanayo. UMnu Gwede Mantashe nguyena ozobamba njengongqongqoshe wamaphoyisa ngaphambi kokuba kungene uSolwazi Firoz Cachalia ozobamba kuze kuphothulwe uphenyo lwekhomishini.
