KUSUKUMISE izintandokazi zabalingisi ukwanda kwezigameko zobuqhwaga nokuhlukumezana kwezingane ezikoleni zakuleli.
Abalingisi okubalwa kubo uMenzi Biyela, Swazy Mokoena, Ndumiso Dlamini, Thembinkosi Thwala nomculi weh-Hip Hop uMpumelelo Gumbi owaziwa ngelikaShon G basungule inhlangano engenzi inzuzo ngenhloso yokulwa nalesi sihlava nezinye izingqinamba ezibhekene nabafundi namalungu omphakathi jikelele.
Ngokusho kukaBiyela oseke wabonakala emidlalweni eyahlukene kumabonakude basungule le nhlangano ebizwa ngokuthi Imvelo Social Development ukuze bakwazi ukuqwashisa nkukhuza lo mhlola emphakathini.
“Siqale umkhankaso esiwubiza ngeBullying Awareness School Tour lapho sihambela khona izikole sixwayisa futhi siqwashisa ngalo mkhuba osubhokile ezikolenii. Zikhona izikole esike sazihambela ngosizo lomnyango ongaphansi kukaMsipala weTheku obizwa nge-Arts And Living Culture kodwa ngenxa yokuthi lesi sihlava sibhoke ezindaweni ezahlukene sibone kungcono ukuthi sisabalale nakwezinye izikole njengoba kuyizona ezisimemayo,” kusho uBiyela.
Uthe ngenxa yezingqinamba abahlangabezana nazo kuyaphoqa ukuthi izikole bazikhokhise.
“Empeleni besingafisi ukuthi izikole sizikhokhise kodwa kuyasinda ukuhambela izindawo njengoba kunezidingo ezahlukene esizidingayo ezidinga ophethiloli nezindawo zokulala uma kukude kuyophoqa. Kungakuhle ukuthi omasipala, iminyango kahulumeni nezinkampani ezizimele zikwazi ukubambisana nathi sikwazi ukufinyelela ezikoleni eziningi ikakhulu ezisemakhaya ngaphandle kokuthi zize zikhiphe imali,” kusho uBiyela eveza ukuthi ngesonto elizayo bazobe behambela izikole eziKwaMhlabuyalingana okubalwa iMbazwana neJozini.
Uthe uma befika ezikoleni baba nomdlalo weshashalazi othatha imizuzu eyishumi bese kuba nomlingisi uBhekisizwe Mahlwe owethula inkulumo ekhuthazayo kuphinde kukhuluma no-Aphelele Sixikixa obeyigwetshwe iminyaka ewu-15 ejele oqwashisa ngobugebengu.
Uthe kuyabakhuthaza ukubona ziqhubeka nokwanda izikole eikhombisa ukuwuthakasela umkhankaso wabo. “Ziningi nezinye izihloko esizongena kuzona ngokuhamba kwesikhathi okubalwa kuzo ukukhulelwa kwezingane (teenage pregnancy), izidakamizwa, ubugebengu nokunye okuthinta ikakhukazi intsha,” kusho yena.
Uthe ngaphansi kwenhlangano yabo sebeke bahambela nasemajele lapho befike baqeqesha khona iziboshwa ngalo mkhakha kanjalo nangokuzifundisa ngomculi futhi bazikhuthaza ukuze ziphume sezicabanga ngendlela ehlukile ezobathuthukisa.
