UKHALA ezimathonsi umculi kamaskandi, uNkunzemdaka, ngosizi abhekene nalo, njengoba ethi sekuphele iminyaka engaphezulu kweyishumi ingamholeli inkampani ayeqopha ngaphansi kwayo. Uthi kuze kwathi ngesonto eledlule yamholela u-R276.83.
Lo mculi osemnkantshubomvu uthi ngaphambi kwemali ayithole ngeledlule, wayegcine ukuhola u-R800 kule nkampani ngo-2012, ngesikhathi enqamula isivumelwano sokusebenzisana nayo.
Uthi ukushiya kwakhe le nkampani kungenxa yokuthi wayenganelisekile ngemali anikezwa yona. Utshele leli phephandaba ukuthi umculo wakhe usadlalwa emsakazweni emikhulu nasezinkundleni zomculo okubalwa kuzona uYoutube.
“Sizofa singenayo imali ngenxa yezinkampani ezidlala ngathi. Umculo wami ufakwe yiyona le nkampani ezinkundleni zokuxhumana, abantu bayawulalela, abanye bayawuthenga ngokuthi bawu-downloade, kodwa ayikho imali engiyitholayo. Ngibuhlungu enhliziyweni yami ngoba umculo siphila ngawo, akusekho okunye esingakwenza njengoba sesikhulile ngokweminyaka,” kusho uNkunzemdaka.
Uthi uqale ukusebenzisana nale nkampani yomculo, engeke idalulwe okwamanje, ngo-2006.
“Kuyona yonke le minyaka, beyiqhubeka le nkampani iwudayisa umculo wami, nakuba besingasasebenzisani. Kuyangithusa ukuthi kuyona yonke le minyaka ngingatholi ngisho indibilishi, bese ngiholelwa la makinati ngemuva kweminyaka eyishumi yonke.”
Uveze ukuthi ngenxa yokuhlazeka kwakhe, uyitshelile le nkampani ukuthi ayibuyele emuva le mali ngoba ngeke iwenze umehluko emndenini wakhe.
Lo mculi uqale ukuqopha ngo-1985, eqoshwa ngowayengumsakazi woKhozi FM, uWelcome “Bhodloza” Nzimande (ongasekho) ezindlini zomsakazo eThekwini, okuthe ngokuhamba kwesikhathi wabe esedlulela eGoli, ezitudiyo ezinkulu.
I-albhamu yakhe yokuqala ngaphansi kwale nkampani yayithi “Ngize kuwe Tata”, wagcina ngethi “Zange Ngibe Umbulali”.
Imizamo yokuthola inkampani yomculo ayisola ngokumdlela imali yakhe kayiphumelelanga njengoba izingcingo bezingabanjwa.
mthobisis@ilanganews.co.za
